Produsaun Bayu-Undan remata, Governu presiza aposta ba kualidade despeza – BCTL
DILI, 03 Agostu 2026 (TATOLI)- Governadór Banku Sentral Timor-Leste, Helder Lopes, hatete sustentabilidade Fundu Mina-rai depende ba fatór prisiál rua mak montante osan ne’ebé Governu dada kada tinan atu finansia Orsamentu Jerál Estadu no montante reseita ne’ebé tama ba Fundu ne’e rasik.
Nia dehan, durante ne’e reseita Fundu Mina-rai mai husi fonte rua mak rendimentu husi produsaun mina no gás, liuliu Bayu-Undan, no retornu husi investimentu Fundu nian.
Governadór ne’e reaksa katak bazeia ba infromasaun katak produsaun Bayu-Undan remata ona maka konserteza afeta ba balansu Fundu Petrolíferu.
“Ba oin, ita iha buat rua ne’ebé ita presiza halo. Dada osan ba ita-nia Orsamentu Jerál Estadu tenke halo maneira sustentavel, kuidadu. Osan ne’ebé ita dada ne’e aposta ba apoia kualidade despeza públika, nune’e bele diversifika ekonomia, bele hatama reseita, nune’e Estadu bele gasta iha futuru”, nia hatete iha Ministériu Finansa, ohin.
Nia mós informa katak Juñu 2026, reseita husi Bayu-Undan ne’ebé BCTL rejista ne’e millaun balun de’it.
Hodi salienta maski reseita husi Bayu-Undan ne’ebé dalaruma laiha ona, BCTL sei kontinua serbisu ho entidade relevante, liuliu Ministériu Finansa atu haree estratéjia investimentu ba Fundu Mina-rai ne’e.
Governadór ne’e espera merkadu nafatin favorese, nune’e retornu husi investimentu Fundu Petróleu nafatin fó retornu ne’ebé boot, atu kada tinan uza de’it funan husi osan ne’ebé investe.
“Maibé, ida-ne’e mai ho kondisaun ida katak, Fundu Mina-rai ita dada hodi finansia ita-nia despeza Estadu ne’e tenke ho maneira sustentavel, aposta ba kualidade despeza, no retornu investimentu merkadu favorese mai ita hodi hetan retornu ne’ebé boot”, nia reitera.
Iha loron 31 Jullu 2026, Ministru Petróleu no Rekursu Minerál, Francisco Monteiro, esklarese Governu simu ona notifikasaun husi empreza petrolífera Santos no parseiru katak produsaun mina no gás iha Bayu-Undan hapara ofisialmente iha 04 Juñu 2025.
Notisía relevante: https://tatoli.tl/2026/07/31/atividade-iha-bayu-udan-hola-parte-iha-dekomisaun-ministru/
Jornalista: Arminda Fonseca
Editora: Maria Auxiliadora
