Autoridade Maliana hasai sirkulár suspende atividade agríkola iha irrigasaun Maliana I
BOBONARU, 04 Agostu 2026 (TATOLI) – Autoridade Postu Administrativu (APA) Maliana hasai ona sirkulár hodi informa ba natar-na’in sira iha suku Ritabou, Raifun, Lahomea, Odomau no Holsa atu suspende atividade agríkola iha segunda époka, iha área irrigasaun Maliana I.
Sirkulár ne’e hasai hodi fó tempu ba empreza atu halo reabilitasaun ba kanál irrigasaun, ponte Buipira no instala kalla (talang) bee foun ne’ebé sei asegura fornesimentu bee ba área agríkola iha futuru.
Administradór Postu Administrativu Maliana, Augusto Caetano, hatete karta sirkulár ne’e fó sai ona iha Jullu ne’e bazeia ba planu no programa husi Ministériu Agrikultura, Pekuária, Peska no Floresta.
“Ha’u hanoin katak ita tenke asegura irrigasaun Maliana I, tanba nia kobre hotu agrikultór sira-nia natar no to’os. Tanba ne’e mak tinan ne’e, MAPPF simu ami-nia pedidu halo konstrusaun ba ponte no intek iha mota Buipira. Kuandu tempu udan ita halo natar uza de’it mota Buipira, se udan-been menus ita bele apoia tan Bulobu, nune’e bele fornese bee”, nia informa, ohin.
Iha fatin seluk, Diretór Servisu Munisipál Agrikultura Autoridade Munisípiu Bobonaru, Longuinhos João, dehan projetu reabilitasaun ne’e halo husi empreza internasionál Minarta ho prazu implementasaun husi Jullu to’o Dezembru 2026.
Notísia relevante: PT. Minarta hahú normaliza kanál irrigasaun Maliana I
Nia dehan katak Diresaun Servisu Agrukultura Munisipál halo avaliasaun hamutuk ho Diresaun Nasionál Irrigasaun, no empreza responsavel konkorda atu muda dezeñu konstrusaun husi kanal orijinál ba sistema kalla hanesan ponte Buipira, tanba modelu ida-ne’e konsidera di’ak liu bazeia ba kondisaun jeolójika no fízika rai iha fatin ne’e.
“Ami fó prazu hahú Jullu to’o Dezembru 2026 molok ita hahú primeira époka bee tenke normaliza ona. Tanba ne’e mak kompañia mós prontu atu hadi’a filafali kanál ne’ebé aat. Sira garante katak molok atu hahú atividade kultivu iha primeira époka, sira garante katak bee sei mai normál hanesan baibain”, dehan.
Aleinde halo reabilitasaun ba kanál irrigasaun, Governu mós kontrata empreza internasionál ida atu halo konstrusaun kallas be foun iha Buipira.
Nia dehan Governu deside halo reabilitasaun no konstrusaun kalla foun ne’e, tanba daudaun volume bee husi irrigasaun Maliana I labele kobre área kultivu ektare rihun-resin.
Maski sistema irrigasaun hetan danu durante tinan ida-ne’e, Longuinhos afirma katak produsaun haree ba primeira époka la hetan impaktu boot, tanba udan kontinua to’o tempu kolleta.
“Bee mai hela de’it, tanba ne’e natar sira ne’e laiha estragu, laiha keixa ka informasaun ruma katak natar balun la konsege kolleta tanba menus bee”, katak.
Irrigasaun Maliana I reabilita dahuluk husi Ajénsia Kooperasaun Internasionál Japaun (JICA) entre tinan 2008 no 2009, hanesan parte husi apoiu povu japonés nudar sinál amizade no kooperasaun entre nasaun rua.
Notísia relevante: Rai-halai kauza danu ba irrigasaun Maliana I
Jornalista: Sergio da Cruz
Editora: Maria Auxiliadora
