Ema na’in-57 konkorre ba vaga STJ no TR

DILI, 04 Agostu 2026 (TATOLI)—Komisaun Rekrutamentu rejista ona ema na’in-57 submete dokumentu no konkorre ba vaga Juíz Supremu Tribunál Justisa (STJ) no Tribunál Rekursu (TR), ne’ebé fó sai iha loron 01 Jullu.

“Vaga ba rekrutamentu juíz ba Supremu Tribunál Justisa taka ona desde ita anúsia vaga iha inisíu Jullu to’o fim Jullu, hafoin taka vaga rekrutamentu ne’e ita simu kandidatu vaga ba Supremu Tribunál ne’e ema na’in-35 no ba vaga juíz sira iha Tribunál Rekursu hamutuk na’in-22,” Membru Komisaun Rekrutamentu, Komisáriu José Pedro Camões, informa ba Jornalista sira iha ninia knaar fatin, STJ, Kolmera, Tersa ne’e.

Notísia relevante : Juíz Antónino prefere Governu fortifika rekursu molok rekruta Juíz STJ

Daudaun juri nasionál na’in-tolu halo hela selesaun dokumentu durante loron 15 to’o 20. Kuandu juri sira halo hotu ona selesaun ba dokumentu maka sei envia ba Komisaun Rekrutamentu atu anúsia ba públiku kona-ba nia rezultadu sira.

Bainhira juri nasionál sira ramata halo selesaun dokumentu maka juri na’in-tolu husi Portugal sei mai Timor-Leste hodi fó teste entervista ba admitidu sira.

Membru Komisaun Rekrutamentu STJ dehan, ba sira ne’ebé la liu iha faze selesaun dokumentu no entervista iha tempu bele hato’o reklamasaun iha prazu loron-30 ba juri atu haree.

Jornalista     : Natalino Costa

Editora          : Julia Chatarina