Embaixadór Malázia hasoru PM Xanana hodi hametin kooperasaun bilaterál
DILI, 04 Agostu 2026 (TATOLI)–Atuál Embaixadór Malázia ba Timor-Leste, Fairuz Adli bin Mohd Rozali, halo nia vizita dahuluk ba Primeiru-Ministru Kay Rala Xanana Gusmão iha Palásiu Governu, tersa-feira ne’e, hanesan parte husi aprezentasaun ofisiál ba ninia misaun diplomátika iha Timor-Leste.
Hafoin enkontru ne’e ramata, atuál Embaixadór Malázia ba Timor-Leste, Fairuz Adli bin Mohd Rozali, hateten katak vizita ida-ne’e nu’udar enkontru introdutóriu atu hametin relasaun kooperasaun bilateral entre Embaixada Malázia no Governu Timor-Leste.
“Ha’u kontente tebes bele hasoru Primeiru-Ministru ohin iha enkontru introdutóriu ida-ne’e. Embaixada Malázia iha Díli prontu atu servisu hamutuk ho Gabinete Primeiru-Ministru, ministériu hotu-hotu no instituisaun sira seluk atu hametin tan relasaun kooperasaun entre nasaun rua ne’e,” Embaixadór Malázia ne’e hateten ba jornalista sira iha Palásiu Governu, ohin.
Nia afirma katak Malázia hakarak hametin kooperasaun bilaterál ho Timor-Leste iha área oioin, tanba antes ne’e relasaun diplomátika entre nasaun rua ne’e metin ona.
Maske nune’e, Embaixadór Fairuz esplika katak iha enkontru ida-ne’e seidauk iha diskusaun kona-ba projetu espesífiku ruma, tanba objetivu prinsipál mak atu aprezenta nia-an hanesan Embaixadór foun Malázia ba Timor-Leste.
“Laiha diskusaun kona-ba projetu espesífiku ruma, tanba ida-ne’e deit enkontru introdutóriu. Ha’u foin to’o iha Díli, iha semana rua liubá,” nia informa.
Enkuantu bainhira jornalista sira husu kona-ba nia impresáun dahuluk kona-ba Timor-Leste, Fairuz dehan katak Timor-Leste mak rai ida-ne’ebé furak loos. Nia sei kontinua aprende no komprende situasaun no aspetu moris iha Timor-Leste atu bele hala’o nia kna’ar diplomátiku ho di’ak.
Biográfia atuál Embaixadór Malázia ba Timor-Leste
Embaixadór Fairuz Adli bin Mohd Rozali hahú okupa kargu hanesan Embaixadór Malázia ba Timor-Leste iha fulan-Jullu 2026. Antes simu knaar ida-ne’e, nia servisu hanesan Vise Diretór Jenerál ba Divizaun Relasaun Esternu ASEAN iha Ministériu Negósiu Estranjeiru Malázia.
Nia mós asume pozisaun diplomátiku oioin inklui hanesan Vice-Xefe Misaun Malázia iha Washington D.C., Konsellu Ministru iha Embaixada Malázia iha Seoul nomós okupa kargu estratéjiku sira iha Ministériu Negósiu Estranjeiru Malázia.
Entretantu nasaun Malázia nu’udar rai ida-ne’ebé sai parseiru besik Timor-Leste ne’ebé estabelese relasaun diplomátika ho Timor-Leste desde tinan 2006, hafoin rekoñese independénsia Timor-Leste iha tinan 2002.
Aleinde apoia prosesu adezaun Timor-Leste ba ASEAN, Malázia kontinua haluan kooperasaun iha área komérsiu, dezenvolvimentu rekursu umanu, edukasaun, saúde no dezenvolvimentu ekonomia.
Jornalista : Alexandra da Costa
Editór : Cancio Ximenes
