Jornalista timoroan 24 finaliza formasaun iha Beijing
BEIJING, 04 Agostu 2026 (TATOLI)—Delegasaun jornalista na’in-24 husi Timor-Leste finaliza ona sira-nia formasaun atu aumenta koñesimentu no abilidade iha área komunikasaun, jornalizmu dijitál, mídia foun no uza teknolojia moderna iha prosesu produsaun notísia ne’ebé hala’o iha Beijing, Repúblika Populár Xina.ntrega sertifikadu ba jornalista timoroan ne’ebé partisipa iha formasaun ne’e.
Reprezentante CICG Institute for International Studies and Advanced Training (CICG IISAT), Li Hengtian, hato’o parabéns ba jornalista Timor-Leste na’in-24 tanba konsege kompleta programa formasaun ho susesu.
Nia mós hato’o agradesimentu ba partisipante sira tanba hatudu interese no envolvimentu ativu durante prosesu aprendizajen, no hato’o apresiasaun ba peritu no ekipa Xina ne’ebé fó apoiu tomak iha programa ne’e.
“Programa ida-ne’e la’ós de’it kona-ba fahe koñesimentu maibé sai mós hanesan ponte atu hametin amizade no komprensaun entre China no Timor-Leste,” Li Hengtian dehan.
Durante loron 20 iha Beijing, jornalista Timor-Leste sira partisipa iha sesaun formasaun kona-ba kondisaun nasionaá Xina, kooperasaun Xina-ASEAN, Inisiativa Belt and Road, modernizasaun Xina no sistema komunikasaun internasionál hosi mídia prinsipál Xina.
Iha Guangxi, delegasaun jornalista Timor-Leste sira haree diretamente aplikasaun teknolojia avansada, inklui Intelijénsia Artifisiál (AI, sigla inglés) iha área saúde, agrikultura no komunikasaun dijitál.
Sira mós aprende kona-ba dezenvolvimentu rurál, konservasaun ambientál, integrasaun kultura ho turizmu no inovasaun industrial ne’ebé uza teknolojia foun hodi aumenta produtividade.
Reprezentante CICG hateten katak mídia iha papél importante nu’udar ponte atu habelar informasaun ne’ebé loos, promove komprensaun no hametin ligasaun entre povu sira.
“Esperiénsia no koñesimentu ne’ebé imi hetan iha Xina sei sai fonte importante atu fahe ba povu Timor-Leste no komunidade ASEAN kona-ba imajen Xina nian ne’ebé loos no kompletu,” nia subliña.
Iha fatin hanesan, Reprezentante jornalista Timor-Leste, Augusto Sarmento dos Reis, hato’o agradesimentu ba CICG, Governu Xina no Governu Timor-Leste liuhusi Sekretáriu Estadu Komunikasaun Sosiál, Expedito Dias Ximenes, tanba fó apoiu no oportunidade ba jornalista sira atu partisipa iha programa ida-ne’e.
Programa ne’e la’ós de’it aumenta kapasidade profisionál jornalista sira-nian maibé mós sai oportunidade atu hametin amizade no koperasaun kona-ba oportunidade entre Timor-Leste no Xina.
“Programa ida-ne’e hanesan enxe kopu mamuk ho koñesimentu, esperiénsia no inspirasaun. Ami sei lori fila ba Timor-Leste esperiénsia aprendizajen profisionál no memória furak husi amizade ne’ebé harii durante iha Xina,” nia hateten.
Serimónia ne’e ramata, nia dehan, CICG reafirma kompromisu atu kontinua organiza programa formasaun no troka esperiénsia ba Timor-Leste no nasaun ASEAN sira seluk, hodi kria plataforma ba fahe koñesimentu no diálogu intelektuál.
CICG sei kontinua hametin kooperasaun ho Governu Timor-Leste no instituisaun mídia sira, hodi kontribui ba haforsa Parseria Estratéjika Kompreensiva entre Xina no Timor-Leste.
Jornalista Timor-Leste na’in-24 ne’e hein katak programa hanesan ida-ne’e bele kontinua iha futuru, hodi haforsa kapasidade mídia nasionál no hametin relasaun entre povu no nasaun rua.
Reprezentante Jornalista timoroan husi Instituisaun RTTL, Faustina Brites de Araujo hato’o sentimentu kontente bainhira tuir formasaun durante semana tolu iha Beijing Xina.
“Ha’u agradese ba Governu Republika Xina ne’ebe servisu hamutuk ho Embaixada Xina iha Timor-Leste no CICG ne’ebe fó oportunidade ba ami tuir formasaun prátika mídia iha Beijing durante semana tolu. Aami aprende ona buat barak liga ho kultura Xina nian, teknolojia modernu ne’ebe utiliza Intelijénsia Artifisiál (AI) iha área komunikasaun, agrikultura, ambiente, saúde, edukasaun no seluk tan,” nia esplika.
Nia fiar katak siénsia no esperiénsia sira-ne’ebé mak aprende durante semana tolu nia laran ne’e bele implementa iha kada instituisaun mídia iha Timor-Leste.
”Ha’u fiar katak ho siénsia ne’ebé mak aprende durante semana tolu bele implementa iha instituisaun mídia ne’ebé mak servisu ba,” nia haktuir.
Nia mos rekomenda ba organizasaun implementadór atu kontinua formasaun espesifiku AI ba jornalista Timor-Leste, nunee ba futuru fó formasaun ne’ebé hanesan kona ba dezenvolvimentu teknolojia moderna.
Antes ne;e, durante formasaun, jornalista sira partisipa iha sesaun aprendizajen kona-ba dezenvolvimentu mídia iha era dijitál, aplikasaun intelijénsia artifisial (AI, sigla inglés) iha jornalizmu, étika mídia, estratéjia komunikasaun no papel mídia iha dezenvolvimentu sosiedade.
Aleinde simu teória, jornalista sira mos halo vizita ba instituisaun mídia, organizasaun kultura no empreza teknolojia iha Beijing hodi haree diretamente oinsá Xina uza inovasaun no teknolojia atu haburas setór mídia no informasaun.
Partisipante sira konsidera formasaun ne’e nu’udar esperiénsia importante atu fahe koñesimentu foun bainhira fila-fali ba Timor-Leste, liuliu iha hadi’a kualidade jornalizmu no promove kooperasaun entre mídia Timor-Leste no Xina.
Programa prátika mídia ne’e mós reforsa relasaun no interkámbiu entre jornalista husi nasaun rua, liuhusi troka esperiénsia kona-ba dezenvolvimentu mídia, kultura no komunikasaun iha mundu modernu.
Jornalista : Felicidade Ximenes
Editór : Cancio Ximenes
