PNTL Dili hamutuk autorodade lokál komprometidu prevene krime online scam
DILI, 03 Agostu 2026 (TATOLI)—Komandu Polísia Nasionál Timor-Leste (PNTL) Dili, Servisu Migrasaunno Autoridade Munisípiu Dili, Segunda ne’e, halo enkontru koordenasaun hodi ko’alia kona-ba serbisu entre autoridade lokál sira hodi prevene krime ilísitu iha Dili.
Komandante PNTL Munisípiu Dili, Superintendente Xefe Polísia Orlando Gomes, hateten, Komandu Munisípiu Dili halo despaisu ba Autoridade lokál sira ba operasaun sidadaun estranjeiru ne’ebé hela iha Dili, nune’e bele fásil kontrola sira-nia movimentu no bele prevene krime online scam iha Dili.
“Ha’u fó hateten ona katak Komandu Munisípiu Dili, ita forma ona formatu ida para distribui ba Ofisiál Polísia Suku sira ho Xefe Suku nune’e bele serbisu hamutuk ho Xefe Aldeia sira, joventude rezisténsia sira iha suku sira, serbisu konjuta para kontrola ema estrajeiru sira ne’ebé mai hela iha ita-nia rai, liliu iha ita-nia suku laran ka iha rezidénsia ka otél ka apartamentu ruma ka iha kos sira ne’ebé mak koloka iha suku, atu nune’e ita bele kontrola sira-nia tama no sai,” Orlando Gomes hateten ba Jornalista sira hafoin enkontru ho Autoridade Munisípiu no autoridade lokál iha Komandu Munisípiu Dili, Segunda ne’e.
Notísia relevante : Tribunál aplika medida tolu ba arguidu scam call center iha Kampung Baru
Komandante ne’e dehan, operasaun ne’e sei hahú iha fulan ne’e hafoin Autoridade Munisípiu Dili, Komandu PNTL, Autoridade Suku no parte Servisu Migrasaun halo ona enkontru koordenasaun ida-ne’e.
“Ita enkontru ne’e depois sira komesa ona hala’o sira-nia serbisu kontrola ita-nia sidadaun sira para hanesan meius ida prevensaun ba krime transnasionál sira ne’ebé mak mosu iha ita-nia rai,” nia akresenta.
Artigu 52 husi Kódigu Prosesu Penál fó biban ba Autoridade Seguransa tama bá ema-nia rezidénsia bainhira suspeita buat rua ne’ebé iha indísiu ba krime.
“Bele fó biban ba ita-nia Autoridade tama otél no apartamentu sira pois mak ita halo koordenasaun para buat hotu la’o tuir prosedimentu,” nia katak.
Biban ne’e, Komandante husu ba Xefe Suku no Xefe Aldeia atu kontrola didi’ak atividade iha suku laran, bairru ka aldeia atu halo prevensaun ba atividade ilísitu.
Iha fatin hanesan, Prezidente Autoridade Munísipiu Dili, Francisco dos Santos, konsidera, atividade ohin importante tebes.
“Ohin ha’u koalia uituan kona-ba papél lider komunitáriu sira oinsá serbisu hamutuk ho Ofisiál Polísia Suku (OPS) sira iha suku ka bairru sira para oinsá atu garantia seguransa dame no estabilidade,” nia katak.
Francisco hateten, nia parte husu ona ba líder komunitariu atu serbisu másimu para iha buat ruma ne’ebé mak autoridade lokál sira deskonfia tenke indiretamente serbisu hamutuk ho OPS atu halo itervensaun ruma.
“Ba kazu nian volume bele kategoria ba menór sira bele halo intervensaun para sira bele rezolve maibé kuandu haree ba kazu ne’e maiór haree ba krime, entaun tenke relata ba OPS atu kombate krime online scam ne’e sidadaun hotu-hotu nia responsablidade, la’ós PNTL nian mesak de’it, laos autoridade munipiu Dili nian mesak de’it, militár sira sidadaun hotu hotu,” nia hato’o.
Nia husu ba hothotu ne’ebé mak hela iha kapital ida nee nia tenke proativu kuandu hetan diskonfia ruma tenke informa direta ba polisia komunitariu sira ou ba iha Komandu para atu bele partisipa.
“Husu ba Xefe Suku, Xefe Aldeia sira delegadu, delegada uza sira nian rekursu ne’ebé mak iha halo operasaun konjunta halo iba bairru laran para atu haree situasaun sira ne’e,”nia dehan.
Iha fatin, Diretór Ezekutivu Servisu Migrasaun, Komisáriu Asistente Polísia Jorge Monteiro, hateten, nia ekipa sei halo serbisu rigór kona-ba kontrolu ema estranjeiru tama-sai territóriu.
“Durante ne’e kona-ba kontrolu ema estrajeiru ne’e husi parte Servisu Migrasaun ne’e rigór liliu vistu turizmu, vistu traballu ne’e durante ne’e ita kontrola ho di’ak,” nia tenik.
Jornalista : Natalino Costa
Editora : Julia Chatarina
