Trump fó oportunidade ikus ba Iraun atu hetan akordu dame
DILI, 04 Agostu 2026 (TATOLI) – Prezidente Estadu Unidus Amérika, Donald Trump hatete katak Washington fó nafatin oportunidade ba Iraun atu hetan akordu ida molok foti asaun militár ne’ebé maka’as liu.
Trump halo deklarasaun ne’e iha tempu ne’ebé aumenta tensaun sira entre Washington ho Teeraun kona-ba Estreitu Ormuz nian.
“Ha’u hakarak fó ba sira oportunidade ikus hotu molok asaun militár ne’ebé alvu ba sira-nia lideransa. Susar tebes halo saida mak ami planeia ona, ne’ebé planeia nafatin,” hatete hosi Trump ba jornalista sira iha loron-segunda ne’e.
“Ita sei haree saida maka akontese, maibé hanesan buat ida ne’ebé maka todan tebes atu halo. Ha’u orgullu tebes tanba ha’u fó oportunidade ba partidu barak,” nia hatete.
Iha loron 18 fulan-Juñu, Teeraun ho Washington asina memorandu entendimentu ida hodi hakotu konflitu ne’ebé hahú iha loron 28 fulan-Fevereiru.
Maibé, iha loron 8 fulan-Jullu, Trump deklara katak sesárfogu laiha ona efeitu. Hahú hosi ne’ebá, forsa sira Estadus Unidus nian lansa ona atake oioin hasoru Iraun.
Komandu Sentrál Estadus Unidus (CENTCOM, sigla portugés) afirma katak atake sira-ne’e hala’o hodi hatán ba asaun sira Iraun nian hasoru ró komersiál sira ne’ebé atravesa Estreitu Ormuz nian.
Hanesan vingansa, Iraun lansa atake sira hasoru baze militár oioin Estadus Unidus nian iha Médiu Oriente.
Iha loron 12 fulan-Jullu, Iraun fó-sai taka Estreitu Ormuz nian to’o interferénsia Estadus Unidus nian iha rejiaun ne’e hapara.
Loron ida liutiha, Trump afirma katak Estadus Unidus sei sai hanesan “guardia” hosi Estreitu Ormuz nian no sei halo fali blokeiu ida ba portu iranianu sira.
Trump: la’ós Iraun, EUA mak sei kobra taxa sira iha Ormuz
Prezidente Estadus Unidus nian Donald Trump hatete katak Washington sei la permite Iraun atu kobra taxa sira ba ró sira ne’ebé liuhosi Estreitu Ormuz nian.
Trump afirma mós katak Estadus Unidus sei sai parte ne’ebé sei kobra taxa sira hanesan ne’e.
“Tenke hanesan ne’e. Ha’u sei la husik sira atu kobra taxa sira. Karik ema ruma maka atu kobra taxa sira, ami mak sei halo ida-ne’e,” Trump afirma.
Nia halo deklarasaun ne’e bainhira husu kona-ba posibilidade hosi Iraun atu restaura asesu navegasaun kompletu no livre ba bee-dalan.
Notísia relevante: Trump kansela kualkér atake hasoru Iraun no afirma akordu foun loke Estreitu Ormus
Fonte: Oananews/Sputnik
