Bobonaru prepara resposta integrada atu hasoru impaktu El Niño
BOBONARU, 05 Agostu 2026 (TATOLI – Autoridade Protesaun Sivíl (APC, sigla portugés) Munisípiu Bobonaru prepara ona resposta integrada ho parseiru no departamentu relevante sira hodi hasoru impaktu husi fenómenu El Niño ne’ebé sei afeta área balun iha munisípiu ne’e.
Komandante Interinu APC Munisípiu Bobonaru, Eusébio Fernandes da Cruz, hatete Governu liuhusi Sekretaria Estadu protesaun Sivíl fó ona orientasaun ba APC atu hahú halo preparasaun no koordena ho parseiru sira.
“Ami iha planu tiha ona, Governu mós fó orientasaun mai ami. Semana ida liu ami aprosima ona ho parseiru sira atu halo enkontru hamutuk hodi prevene El Niño”, Eusébio dehan.
Tuir nia, APC sei identifika suku sira ne’ebé bele hetan impaktu husi bailoro naruk, inklui fatin bee-matan no fonte bee komunidade nian ne’ebé bele maran durante estasaun udan menus.
APC mós sei koordena ho Prezidente Autoridade Munisípiu Bobonaru atu hala’o enkontru ho servisu relevante sira antes tun bá suku-suku hamutuk ho autoridade lokál hodi identifika fonte bee ne’ebé vulneravel no buka alternativa atu asegura fornesimentu bee ba komunidade, liuliu sira ne’ebé hela iha área foho-leten.
“Identifikasaun ne’e sei hala’o hamutuk ho departamentu relevante sira. BTL, pur ezemplu, bele apoia instalasaun rezervatóriu bee (fiber), ami Bombeiru sei distribui bee ba komunidade sira ne’ebé presiza”, nia dehan.
Hodi hatete katak preparasaun ida-ne’e importante tanba Timor-Leste uluk mós hasoru El Niño iha tinan 2016, ne’ebé afeta komunidade barak.
Relasiona ho kultura sunu-rai iha Holsa no Tapo-Memo, Eusébio dehan asuntu ne’e presiza diskusaun hamutuk entre lideransa nasionál no komunitária sira, tanba kultura refere eziste kle’ur ona iha komunidade.
Iha parte seluk, Koordenadór BTL Delegasaun Munisípiu Bobonaru, Adriano da Cruz, asegura katak BTL sei kontinua garante distribuisaun bee ba konsumidór sira durante estasaun bailoro naruk.
“Nafatin ami asegura distribuisaun bee ba zona sira ne’ebé hetan fornesimentu husi sistema bomba no fonte Bulobu. Distribuisaun sei la’o tuir oráriu ne’ebé estabelese ona”, dehan.
Nia mós husu ba konsumidór sira atu uza bee ho matenek no taka torneira bainhira la presiza, atu fornesimentu bee bele to’o ba kliente hotu.
Adriano aumenta katak karik iha problema hanesan bee la sai ka presaun bee menus, komunidade tenke kontaktu kedas ekipa téknika BTL, la’ós halo reparasaun rasik, hodi evita danu ba sistema distribusaun bee.
El Niño hanesan fenómenu klimátiku ne’ebé akontese, tanba anin pasífiku fraku, nune’e mós bee-manas iha tasi-okos Oseanu Pasífiku sa’e no lori bailoro naruk ho udan-been menus ba Timor-Leste. Fenómenu naturál ne’e akontese periódikamente kada tinan tolu to’o lima. Nia fó impaktu boot tebes ba produsaun ai-han, bee-moos, no moris loron-loron agrikultór sira-nian
Notísia relevante: Ramos-Horta alerta ba ameasa El Niño no husu medida preventiva imediata husi Governu
Jornalista: Sergio da Cruz
Editora: Maria Auxilidora
