Eleitór 24.868 iha Bobonaru atualiza ona kartaun biométriku
BOBONARU, 05 Agostu 2026 (TATOLI) – Sekretariadu Tékniku no Administrasaun Eleitorál (STAE) rejista eleitór na’in-24.868 iha munisípiu Bobonaru mak atualiza ona dadus ba kartaun eleitorál biométriku, husi totál eleitór 78.559 ne’ebé rejista iha sistema.
Diretór STAE Munisípiu Bobonaru, José Guterres, dehan programa Resensiamentu Eleitorál no Atualizasaun Baze Dadus (REABD) hahú dezde Novembru 2024 no progresu kontinua la’o tuir planu ne’ebé estabelese.
“Eleitór ne’ebé eziste iha sistema hamutuk 75.456. Hahú husi atualizasaun iha Novembru 2024 to’o Jullu 2026, eleitór ne’ebé atualiza ona hamutuk 24.868, kompostu husi mane 12.011 no feto 12.857. Daudaun ne’e totál eleitór ne’ebé rejista iha STAE Munisípiu Bobonaru hamutuk 78.559”, José Guterres dehan ba jornalista sira, ohin.
Nia esplika katak STAE mós rekruta ona ofisiál postu iha fulan-Maiu 2026, maibé atendimentu iha postu administrativu seidauk hahú tanba ekipamentu no materiál apoiu ba servisu ne’e sei iha prosesu akizisaun.
“Tuir planu, karik la ha obstákulu, iha inísiu fulan-Setembru ami sei loke atendimentu iha postu administrativu lima. Postu Administrativu Maliana la inklui tanba iha ona sentru atendimentu iha kapitál munisípiu”, dehan.
José Guterres akrexenta katak durante períodu Setembru 2025 to’o Jullu 2026, STAE labele imprime kartaun eleitorál biométriku ba eleitór sira, tanba falta blanku no materiál nesesáriu, maibé agora prosesu impresaun hahú fali tanba ekipamentu no blanku sira to’o ona.
Nune’e mós, nia hatete dezafiu boot ida mak rekizitu dokumentasaun ba eleitór sira ne’ebé hela iha área remota, liuliu iha Postu Administrativu Bobonaru, Atabae no Lolotoe. Tuir Lei Nú. 19/2021, eleitór tenke iha Billete Identidade (BI) válidu, sertidaun moris no pasaporte Timor-Leste válidu atu halo rejistu ka atualizasaun biométriku.
“Ferik-katuas barak ne’ebé hela iha foho dook seidauk iha dokumentu tolu ne’e, ida-ne’e mak sai obstákulu ba atendimentu”, nia relata.
STAE apela ba eleitór sira ne’ebé seidauk atualiza sira-nia dadus atu bá iha fatin atendimentu hodi halo atualizasaun kartaun eleitorál biometriku, nune’e programa Governu bele implementa ho di’ak no garante dadus eleitorál ne’ebé atualizadu.
Notísia relevante: STAE Bobonaru halo REABD Biométriku ba EhD no idozu 6.110
Jornalista: Sergio da Cruz
Editora: Maria Auxiliadora
