Mini Jardín Zoolójiku Palásiu Prezidensiál promove edukasaun ambientál no protesaun vida selvajen
DILI, 05 Agostu 2026 (TATOLI) – Mini Jardín Zoolójiku ne’ebé kria iha resintu Palásiu Prezidensiál Nicolau Lobato, Dili, nu’udar espasu ba edukasaun ambientál, hodi hakbesik populasaun, liuliu labarik no joven sira ba natureza no enkoraja konxiénsia boot liután kona-ba importánsia ba animál fuik sira no konservasaun florestál.
Xefe Kaza Sivíl Prezidénsia Repúblika, Henriqueta da Silva, hateten ba Tatoli katak inisiativa ne’e hetan signifikadu espesiál iha tempu ne’ebé realiza Maratona Internasionál Dili iha tinan ne’e, ne’ebé ho tema “Hadomi Ita-Nia Ai-laran no Animál Fuik sira”, hodi promove reflesaun kona-ba relasaun entre ema, biodiversidade no ambiente.
Tuir nia, Mini Jardín Zoolójiku ne’e kria hanesan instrumentu sensibilizasaun ida hodi hatudu katak animál sira halo parte iha ekosistema hanesan ho ema.
“Bainhira ita hakarak atu proteje ita-nia animál fuik sira, ita tenke sensibiliza animál sira iha ne’e. Iha Mini Jardín Zoolójiku ne’e hatudu katak sira ita-nia belun no ita ema moris iha ekosistema ne’ebé hanesan. Tanba ne’e, ita tenke proteje sira, tanba animál no ai-laran sira halo ambiente sai furak no saudavel liu. Se laiha sira, mundu sei sai ki’ak liután”, nia hatete.
Henriqueta da Silva subliña katak animál sira labele haree de’it hanesan elementu sira beleza nian ka atrasaun nian, maibé hanesan ser sira ne’ebé iha papél esensiál iha ekilíbriu natureza nian.
“Animál sira ne’e hanorin ita lisaun moris ida, tanba sira mós hola parte iha ita-nia ekosistema. Ezemplu, pavaun, liuhusi nia dansa, bele fó sai udan besik ona. Iha mós espésie seluk ne’ebé tranzmite sinál husi natureza liuhusi sira-nia lian”, nia esplika.
Hodi alerta mós kona-ba ameasa sira ne’ebé espésie barak hasor, tanba atividade umana sira, maka hanesan kasa ilegál no destruisaun ba ai-laran sira, ne’ebé konstitui sira-nia abitat naturál.
“Ita tenke hadomi ita-nia animál fuik sira, liuliu espésie endémika sira ne’ebé halo parte iha ita-nia rikusoin naturál, animál barak mak lakon ka muda ba área seluk tanba kasa ilegál no deflorestasaun estraga hela sira-nia abitat”, nia destaka.
Ba Henriqueta da Silva, protesaun ba animál fuik sira tenke hahú ho edukasaun no kriasaun relasaun respeitu nian entre ema no animál sira. “Sira mós iha sira-nia família, hanesan mós ita-sira presiza hahán no fatin atu hela. Tanba ne’e, ita tenke proteje no respeita sira hanesan ita proteje ita-nia familia rasik”, nia dehan.
Mini Jardín Zoolójiki ne’e rasik daudaun iha espésie oioin, inklui kuda, pavaun, loriku, rusa, no lagartu.
Animál sira ne’e balun lori husi Indonézia, seluk oferese ba Prezidente Repúblika, José Ramos-Horta, husi membru komunidade no entidade oioin.
Nune’e, Mini Jardín Zoolójiku nu’udar fatin ida atu hatudu animál sira, hakarak estabelese nia-an hanesan espasu ida ba aprendizajen no konxiénsia ambientál, iha ne’ebé jerasaun foun sira bele aprende liután kona-ba animál fuik sira no komprende importánsia husi konservasaun natureza nian.
Lembra katak Mini Jardín Zoolójiku ne’e inaugura iha loron 23 Setembru tinan 2025.
Notísia relevante: Mini-Jardín Zoolójiku atu promove konservasaun no kompaixaun
Jornalista: Arminda Fonseca
Editora: Maria Auxiliadora
