“2027 laiha rekrutamentu tanba dívida barak no hadi’a servisu bazeia ba grau”
DILI, 06 Agostu 2026 (TATOLI)—Primeiru-Ministru, Kay Rala Xanana Gusmão, atualiza rezulatdu reuniaun Konsellu Ministru ba Prezidente Repúblika, José Ramos-Horta, kona-ba aprovasaun rezolusaun Governu kona-ba suspensaun rekrutamentu foun ba funsionáriu públiku sira iha 2027.
Notísia Relevante: Governu deside suspende rekrutamentu funsionáriu públiku no kontrata traballadór kazuál
“Iha tinan 2027 ne’e laiha rekrutamentu ba funsionáriu públiku sira, tanba ita atu kurije no hadi’a sistema administrasaun tanba dívida barak tebes, hanesan hadi’a servisu bazeia ba grau (nivel lisensiatura). Depois mak ita haree fali,” Primeiru-Ministru, Kay Rala Xanana Gusmão, hateten ba jornalista sira iha Palásiu Prezidensiál Nicolau Lobato, Bairru Pite, ohin.
PM Xanana relata mós kona-ba desizaun Konsellu-Ministru ne’ebé sei deside delegasaun ruma ba iha Papua Nova Guiné hodi akompañia no fó seguransa sira-nia prosesu eleisaun.
Aleinde ne’e, Xefe Governu dehan iha semana kotuk mós Governu aprova subsídiu ba orgaun komunikasaun sira no preparasaun ba selebrasaun loron FALINTIL nian iha foho Matebian.
Kona-ba vizita ofisiál husi Ministru Defeza iha Portugál, nia informa, ne’e atu asina memorandu ho Governu Portugés ba asuntu militár nian no mós informa kona-ba estudante timoroan sira-ne’ebé ba partisipa iha kompetisaun ASEAN nian sempre lori medalla osan-mean
“Ha’u mós informa ba PR kona-ba ha’u-nia viajen ba Austrália no Xefe Estadu mós relata kona-ba ninia viajen ba Vanuatu, tanba ne’e nia dehan Prezidente Papua Nova Guiné, Vanuatu no Fiji sei mai Vizita Timor-Leste iha loron 28 Novembru,” nia dehan.
Jornalista : Alexandra da Costa
Editór : Cancio Ximenes
