Governu deside suspende rekrutamentu funsionáriu públiku no kontrata traballadór kazuál
DILI, 29 Jullu 2026 (TATOLI)—Governu liuhusi reuniaun Konselllu Ministru, kuarta ne’e, aprova proposta rezolusaun Governu ne’ebé aprezenta husi Prezidente Komisaun Funsaun Públika, Agostinho Letêncio de Deus, hodi deside suspende rekrutamentu ba funsionáriu públiku no ajente administrasaun públika, nune’e mós kontratasaun ba traballadór “kazuál” sira.
Bazeia ba komunikadu ne’ebé Agência Tatoli asesu iha portál Governu deklara katak intensaun husi proposta rezolusaun Governu ida-ne’e atu limita kreximentu kontinua husi administrasaun públika, ne’ebé hala’o lahó prosesu selesaun ne’ebé rigorozu no bazeia ba nesesidade reál. Nune’e kauza ne’ebé iha sei aumentu ida-ne’ebé boot iha despeza orsamentál.
Tamba ne’e ho rezolusaun Governu ne’ebé propoin ne’e bele salvaguarda ezesaun sira-ne’ebé relasiona ho kontratasaun ba Gabinete Ministeriál sira.
Aleinde ne’e prosesu selesaun bazeia ba méritu ba kargu diresaun no xefia nian, nomós karreira ka grupu profisionál sira ho vaga no orsamentu ne’ebé aprova ona iha tinan kotuk, nune’e mós karreira dosente universitáriu no profisionál saúde nian ne’ebé justifika ho falta pesoál.
Jornalista : Alexandra da Costa
Editór : Cancio Ximenes
