Arguidu 20-resin husi krime scam call center iha Ulmera halai sees husi prosesu judisiál
DILI, 06 Agostu 2026 (TATOLI)—Arguidu 20-resin husi krime scam call center, ne’ebé ekipa husi Diresaun Investigsaun Kriminál kaptura iha área Ulmera Suku Tibar, Postu Administrativu Bazartete Munisípiu Likisá, halai sees husi prosesu judisiál.
Portavós Polísia Nasionál Timor-Leste (PNTL), Superintendente Xefe Polísia João Belo dos Reis, hateten, foin daudaun arguidu sira ne’e submete ona ba interrogatóriu dahuluk iha Tribunál Judisiál Primeira Instánsia Dili (TJPID) no iha ona despaisu hodi aplika kausaun ba arguidu sira, maibé sira seidauk selu kausaun, halai sees ona husi fatin ne’ebé sira hela bá iha parte Ulmera.
“Iha parte Ulmera iha 20-ital sees ona husi fatin ne’ebá, seidauk selu tan kausaun ne’ebé Tribunál aplika ba sira ba kazu ne’ebé sira agora hasoru,” João Belo dos Reis hateten ba Jornalista sira, Kuarta ne’e.
Notísia relevante: Tribunál aplika kauasaun $10.000 ba Jerente atividade scam iha Ulmera
Nia dehan, Autoridade Seguransa tau-matan ba arguidu sira ne’ebé mak envolve krime scam call center ne’ebé Tribunál hasai ona despaisu hodi aplika Termu Identidade Rezidénsia (TIR), aprezentasaun períodika, proibisaun auzénsia no medida kausaun.
“Seguransa ita tau iha ne’ebá, PNTL kontrola iha fatin sira ne’ebé koloka ba, monitorizasaun la’o nafatin, maibé ema ida-idak ho ninia matenek, ho ninia kapasidade rasik buka serbisu ou sees husi fatin, ita labele kontrola,” nia akresenta.
Komandante ne’e rekoñese, kondisaun ne’e nu’udar dezafiu ba Autoridade Seguransa sira, tanba ne’e presiza atensaun.
“Dezafiu ba ita, tanba ne’e ita presiza haree sistema tomak iha ita-nia nasaun Timor-Leste, PNTL nia kompeténsia, órgaun seluk nia kompeténsia mós ita presiza haree hamutuk ho instituisaun relevante sira tenke buka solusiona problema ne’e,” nia katak.
Nune’e, nia husu ba arguidu sira atu kontinua kumpre ba desizaun Tribunál hodi labele hasees-an husi fatin ne’ebé sira uluk hela ba.
“Bainhira Tribunál hasai desizaun sira ne’e sei filafali ba arguidu sira ne’ebé aluga anteriór nafatin ne’ebé mak ita halo operasaun iha ne’ebá. Desizaun Tribunál depois fó tempu ba sira ne’e, sira iha direitu atu multa,” nia tenik.
Jornalista : Natalino Costa
Editora : Julia Chatarina
