JMT Vikeke hahú distribui billete ba negosiante sira hodi asesu merkadu Olobai
VIKEKE, 06 Agostu 2026 (TATOLI)–Ekipa husi Diresaun Jestaun Merkadu no Turizmu (JMT) iha Munisípiu Vikeke, hahú distribui billete ba negosiante sira hodi asesu bá Merkadu Munisipál Olobai lokalizadu iha Suku Karaubalu, Postu Vikeke Vila, Kinta ne’e.
Diretóra JMT Munisípiu Vikeke, Mirandolina Fátima da Costa Guterres, hateten billete ne’ebé agora daudaun ekipa JMT Vikeke distribui ba negosiante sira iha kapitál Vikeke Vila hamutuk 90 no billete nia objetivu atu negosiante sira idaidak tama merkadu Olobai hodi halo negósiu bazeia ba billete ne’ebé sira simu.
Notísia relevante: Governu inaugura Balkaun Úniku no merkadu Olobai Vikeke
“Tanba ne’e, ita distribui billete ne’e komesa horisehik to’o agora ramata ona. Iha billete ne’e tau negosiante sira-nia identidade pesoál hanesan naran, númeru kartaun eletorál no númeru fatin ne’ebé prepara ba negosiante sira. Iha billete ne’e kada negosiante iha ninia númeru ne’ebé sira tama tuir númeru ne’ebé ami atribui ba sira. Tanba iha merkadu laran ba fatin negosiante sira-nian ami taka hotu númeru,” Mirandolina Fátima da Costa Guterres ba TATOLI iha Postu Vikeke Vila.
Aleinde ne’e, nia esplika, distribuisaun billete ne’e ekipa sira mós fó hanoin ba negosiante sira para komprende hodi muda bá merkadu Olobai, tanba komesa loron 10 fulan-Agostu to’o loron 23 fulan-Agostu 2026 negosiante sira hotu-hotu fa’an ona sasán iha merkadu Olobai.
“Tanba ita prepara ona kondisaun merkadu Olobai di’ak ona, entaun ita tenke uza hodi halo atividade negósiu iha merkadu Olobai ne’ebé ita inaugura ona iha semana kotuk,” nia tenik.
Maibé, nia afirma, bainhira to’o loron 23 fulan-Agostu mak negosiante sira lakohi muda bá merkadu Olobai, Diresaun JMT sei foti medida hamutuk ho autoridade no Sekretaria Estadu Asuntu Toponímia no Urbanizasaun (SEATOU) hodi muda negosiante sira obrigatoriamente bá merkadu Olobai.
“Tan ne’e, ami nafatin fó hanoin ba ita-nia negosiante sira-ne’ebé ohin simu ona billete ne’e komesa prepara an ona hodi muda bá merkadu Olobai no ita tenke koopera hamutuk hodi prosesu muda ne’e bele la’o ho di’ak,” Mirandolina akresenta.
Nia relata negosiante sira liuliu fa’an sasán iha merkadu antiga sei muda totalmente inklui mós negosiante sira-ne’ebé produtu lokál iha dalan ninin sira sei muda hotu bá merkadu Olobai.
Tuir dadus, negosiante ne’ebé sei koloka bá merkadu Olobai hamutuk ema na’in-90 bazeia ba billete ne’ebé JMT prepara no atribui ba negosiante sira kompostu husi negosiante fa’an produtu lokál, kulinária, mini restaurante, vestuáriu ka fa’an roupa.
Jornalista: Vitorino Lopes da Costa
Editór: Xisto Freitas da Piedade
