Tribunál aplika kausaun $3.000 ba arguidu envolve atividade scam call Center iha Fatuhada
DILI, 06 Agustu 2026 (TATOLI)–Tribunál Judisiál Primeira Instánsia Dili (TJPID), Kinta ne’e, aplika medida kausaun $3.000 ba kada arguidu na’in-hitu ne’ebé alegadamente ba atividade scam call center iha Fatuhada, ne’ebé Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) detein iha Segunda (03/08).
Iha interrogatóriu dahuluk ne’e, Juíza Estajiária Maria da Silva halo uluk identifikasaun ba arguidu na’in-hitu ne’e.
Nune’e iha tempu hanesan, Ministériu Públiku (MP) ne’ebé reprezenta husi Prokuradór João Marques promove arguidu sira ho krime jogu ilísitu ne’ebé previstu iha artigu 322, asosiasaun kriminoza previstu iha artigu 188, brankamentu kapitál previstu iha artigu 313, no burla informátika previstu iha artigu 268 husi Kódigu Penál Timor-Leste nian.
Notísia relevante : Ekipa Konjuta detein sidadaun estranjeiru na’in-hitu suspeitadu atividade scam iha Fatuhada
Iha alegasaun, MP husu ba Tribunál atu aplika medida haat ba arguidu sira hanesan aprezentasaun períodika, proibisaun ba auzénsia, kausaun kada arguidu $3.000 no kontinua mantein ho medida Termu Indentidade Rezidénsia (TIR) ne’ebé antes ne’e iha ona.
Maibé parte Defeza Advogadu Privadu Euzébio Oliveira husu ba Tribunál atu haree uluk lai kona-ba mandadu detensaun. Tanba Autoridade Seguransa sira halo operasaun hodi tama iha arguidu sira-nia rezidénsia lahó mandadu, tanba ne’e presiza tetu.
Iha biban ne’e, Advogadu Euzébio aseita ho kausaun ne’ebé Prokuradór alega no husu atu Tribunál aplika kausaun menus husi $3.000.
Hafoin rona tiha parte hotu, Juíza Estajiária, Maria da Silva Pinto, ne’ebé turnu iha prosesu ne’e, deside aplika medida tolu ba arguidu na’in-hitu, mantein ho medida TIR ne’ebé antes ne’e iha ona, medida proibisaun ba auzénsia no medida kausaun $3.000 ba kada arguidu.
Jornalista : Natalino Costa
Editora : Julia Chatarina
