DIM 2026 iha mudansa tanba atleta internasionál barak mak mai partisipa
DILI, 08 Agostu 2026 (TATOLI)—Prezidente Federasaun Atletizmu Timor-Leste no Prezidente Konfederasaun Desportu Timor-Leste, Afrânio Xavier Amaral, hateten Dili Internasionál Maratona 2026 ne’e iha mudansa boot kompara ho edisaun sira liubá, liuliu tanba atleta internasionál barak mak mai partisipa.
Afrânio Xavier dehan, edisaun tinan 2026 ne’e simu partisipasaun másimu husi atleta sira mai husi nasaun oioin inklui Xina, Austrália no Indonézia, ne’ebé hatudu katak Dili Internasionál Maratona kontinua hetan interese husi komunidade desportiva internasionál.
Partisipasaun atleta internasionál ne’e konsidera hanesan indikadór importante ida ba dezenvolvimentu Dili Internasionál Maratona, ne’ebé hahú husi 2010 no agora tama ona ba edisaun da-10.
Eventu DIM 2026 ne’e mós sei hala’o ho kursu Full Maratona 42.195Km, Half Maratona 21.1Km, eventu Para-Athletes 10Km no Fun Run 5Km.
“Ita mos iha mudansa boot ba partisipa meia maratona nomós fun run ba ita-nia estudante, funsionáriu, Vise-Primeiru-Ministru no entidade oioin, tanba eventu Dili Maratona iha tinan ne’e di’ak tebes,” Prezidente konfedersaun ne afirma.
Aleinde eventu ne’e espesiál tebes, tanba partisipa husi Prezidente Asian Athletics nian, hodi haree direta lala’ok eventu referidu.
“Iha vizita ne’e Prezidente Asian Athletics, Dahlan Jaman Al-Mahad, estabelese mós kooperasaun ho ministériu edukasaun kona-ba aplikasaun Atletizmu iha kurríkulu eskola,” nia dehan.
Eventu ne’e partisipa mós husi influencer mídia sosial husi Indonézia, ne’ebe konvida direta husi Prezidente Repúblika.
“Ita hatene katak ohin iha mudansa rekor ida ne’ebé boot iha full maratona, atleta husi Xina Zhāngbāngliü, nia mak sai kampiaun ho oras rua (2) minutu sanulu resin lima (15), kompara ho iha 2017 Romeu termina ho oras rua (2) minutu rua nulu resin (26), maibé ita-nia atleta mos halo rekor di’ak,” nia esplika.
Nia espera katak eventu ne’e bele halibur liu 5.000 partisipante husi liu nasaun 30 no atividade maratona ne’e hetan sertifikasaun World Athletics no akreditasaun AIMS.
Tuir Afrânio Xavier, aumentu partisipasaun husi atleta internasionál fó impaktu pozitivu ba atletizmu Timor-Leste, tanba atleta lokál sira bele hetan oportunidade atu kompete no aprende husi esperiénsia atleta internasionál sira.
Aleinde promosaun desportu, Dili International Maratona mós sai plataforma ida atu promove saúde, turizmu, amizade no unidade, no hatudu ba mundu katak Timor-Leste iha kapasidade atu organiza eventu desportivu internasionál ho partisipasaun hosi nasaun oioin.
Dili Internasionál Maratona 2026, ne’ebé hala’o iha 08 Agostu, mós lori tema “Hadomi Ita Nia Ai-Laran no Balada Fuik Sira”, ho mensajen importante kona-ba proteje ambiente no patrimóniu naturál Timor-Leste.
Ho partisipasaun atleta internasionál ne’ebé aumenta, edisaun 2026 espera sai ida husi eventu desportivu internasionál importante liu iha Timor-Leste no kontribui ba promosaun Díli hanesan destinasaun ba turizmu desportivu iha rejiaun Sudeste Ázia.
Jornalista : Felicidade Ximenes
Editór : Cancio Ximenes
