DIM fó oportunidade ba estudante sira no família partisipa iha ambiente saudável
DILI, 08 Agostu 2026 (TATOLI)—Atividade ba labarik no família sira hala’o hanesan parte husi programa Dili Internasionál Maratona 2026 ho apoiu husi Ministériu Edukasaun no parseiru sira hodi fo oportunidade ba labarik no familia atu partisipa iha ambiente saudável.
Diretór Eskola Sekundária Jerál 12 Novembru Bekora, Marcolino Menezes Magno, konsidera eventu referidu benefísiu boot tebes ba estudante sira.
“Dahuluk ita haree husi estudante sira-nia partisipasaun ne’e benefísiu tebes ba sira-nia saúde, oinsa sira bele iha koñesimentu atu kuidadu sira-nia saude. Daruak, husi atividade ne’e bele promove Timor-Leste ba mundu,” Marcolino hateten ba jornalista sira iha Palásiu Prezidensiál Nicolau Lobato, Bairru Pite, ohin.
Dirijente ne’e mos husu ba Governu atu hadi’a di’ak liután atividade refere liuliu partisipasaun estudante sira-nian.
“Tanba ita haree estudante sira-ne’ebé mai kuaze partisipa de’it iha maratona 5Km, maibé ita hakarak estudante sira-ne’e bele partisipa mós iha 10Km no 42Km,” nia relata.
Nunee estudante eskola sekundária jerál 12 Novembru Bekora, Ana Maria Guterres, sente orgullu tanba Governu loke ona eventu refere, hodi fó mós oportunidade ba sira atu partisipa.
“Ida-ne’e orgullu ida ba ami, tanba ami bele partisipa iha eventu Dili Internasionál Maratona. Eventu ida-ne’e fo hanoin mai ami oinsá kuidadu ami-nia saúde hodi kompete iha atividade sira seluk,” Ana Maria Guterres hateten.
Estudante ne’e husu ba Governu atu organiza mós atividade hanesan iha eskola sira, atu estudante sira bele kompete.
“Maibé ami husu ba Governu atu loke mós iha eventu hanesan ne’e iha eskola, nune’e ami estudante bele partisipa ho másimu liután iha atividade sira hanesan ne’e,” nia afirma.
Husi atividade nee partisipa husi eskola sira iha Dili laran, hahú husi nivel primariu too sekundariu.
Husi ne’e estudante sira halo animasaun no dada rifa, nune’e manan prámiu fantastiku sira hanesan atributu eskola no materiál sira seluk.
Atividade ne’e fó oportunidade ba labarik no família atu partisipa iha ambiente saudável, hametin espíritu desportivu, promove saúde no bem-estar nomós haburas koñesimentu kona-ba importánsia atividade fízika.
Partisipasaun família no labarik sira konsidera importante atu hamosu kultura desportu iha komunidade liuliu ba jerasaun foun sira hodi hametin kolaborasaun entre instituisaun Governu, parseiru no komunidade.
Atividade ne’e mós sai parte ida husi esforsu hamutuk atu promove Dili hanesan sidade ne’ebé ativa, saudável no inkluziva liuhusi desportu.
Jornalista : Felicidade Ximenes
Editór : Cancio Ximenes
