Múzika hametin amizade TL no Indonézia iha Cross Border Fest 2026
ATAMBUA, 08 Agostu 2026 (TATOLI) – Ministériu Turizmu Repúblika Indonézia (Kemenpar RI) promove Garuda Sakti Cross Border Fest 2026 iha Atambua, Kabupaten Belu, Nusa Tenggara Timur (NTT), nu’udar espasu atu hametin amizade entre Timor-Leste no Indonézia liuhusi múzika, arte no kultura.
Xefe Biro Dadus no Sistema Informasaun Ministériu Turizmu RI, Nova Arisne, hateten kompetisaun korál ne’ebé sai parte husi série atividade Cross Border Fest la’ós de’it sai espasu ba partisipante sira atu hatudu sira-nia kapasidade, maibé mós sai meiu atu harii unidade no fraternidade entre komunidade nasaun rua.
“Mai ita uza múzika nu’udar meiu atu hametin no hakbesik liután relasaun amizade entre Timor-Leste no Indonézia. No mai ita selebra diversidade no respeita malu iha espíritu fraternidade,” Nova hateten iha atividade refere iha Atambua.
Nova fó apresiasaun ba partisipasaun grupu koru husi Arkidioseze Dili no Dioseze Baucau iha Timor-Leste, ne’ebé partisipa iha kompetisaun hamutuk ho grupu sira husi Dekanat Malaka, Kefamenanu no Belu Utara husi Dioseze Atambua, Indonézia.
Nia mós fó apresiasaun ba membru júri sira tanba sira-nia dedikasaun no profisionalizmu hodi asegura susesu kompetisaun ne’ebé halibur grupu koru husi nasaun rua refere.
Iha kompetisaun ne’e, Timor-Leste reprezenta husi Grupu Koru Santa Cecilia Balide husi Arkidioseze Dili no Grupu Koru Parókia Santo António Lacluta husi Dioseze Baucau.
Bazeia ba rezultadu kompetisaun ne’ebé anunsia iha sexta-feira (07/08) kalan, Santa Cecilia Balide sai kampiaun daruak, enkuantu Parókia Santo António Lacluta okupa pozisaun dalima.
Entretantu, Responsavel ba Funsaun Informasaun, Sosiál no Kultura (PENSOSBUD) Embaixada Repúblika Indonézia (KBRI) iha Dili, Ratu Yulya Chaerani, hateten envolvimentu Timor-Leste iha Garuda Sakti Cross Border Fest sai parte husi esforsu atu habelar interasaun entre komunidade nasaun rua.
“KBRI Dili iha papél nu’udar ponte ne’ebé promove partisipasaun Timor-Leste iha Garuda Sakti Crossborder Fest. Festivál ida-ne’e sai espasu ba komunidade Timor-Leste atu hatudu sira-nia talentu iha área arte no kultura, no iha tempu hanesan habelar interasaun ho komunidade Indonézia, nune’e bele hametin liután relasaun amizade entre Indonézia no Timor-Leste liuhusi kontaktu entre povu ka people-to-people contact,” Ratu hateten ba TATOLI.
Iha preparasaun ba partisipasaun Timor-Leste, KBRI Dili anteriormente halo koordenasaun ho Sekretaria Estadu Arte no Kultura (SEAK) Timor-Leste no parte dioseze sira atu fasilita grupu koru hodi partisipa iha kompetisaun refere.
Tuir Ratu, atividade hanesan Garuda Sakti Cross Border Fest iha signifikadu ne’ebé luan liután, tanba área fronteira bele sai espasu atu harii amizade no iha tempu hanesan promove prosperidade ba komunidade nasaun rua.
“Ami fiar katak fronteira la’ós de’it liña ne’ebé haketak nasaun rua, maibé sai ponte amizade no prosperidade hamutuk (border prosperity),” nia dehan.
Nia espera atividade hanesan Cross Border Fest bele aumenta vizita no movimentu komunidade iha fronteira entre Timor-Leste no Indonézia, ne’ebé ikusmai bele fó impaktu ba dezenvolvimentu setór turizmu no ekonomia lokál.
“Liuhusi atividade hanesan ida-ne’e, ami espera vizita iha fronteira bele kontinua aumenta, promove turizmu, movimenta ekonomia lokál no fó benefísiu reál ba komunidade iha nasaun rua. Ho interasaun entre komunidade ne’ebé sai forte liután, fundasaun relasaun bilaterál entre Indonézia no Timor-Leste mós sei sai metin liután,” nia hateten.
Prezensa partisipante Timor-Leste iha Garuda Sakti Cross Border Fest sai nu’udar forma ida husi relasaun entre komunidade ka people-to-people contact liuhusi arte no kultura iha área fronteira.
Atividade refere mós hetan partisipasaun husi Xefe Servisu Turizmu no Kultura Kabupaten Belu, Januaria Nona Alo; Ajente Konsuladu Timor-Leste iha Belu, Bonifâcio Fátima Martins Belo; reprezentante KBRI Dili; no Vigáriu Jerál Arkidioseze Dili, Padre Graciano Santos Barros.
Garuda Sakti Cross Border Fest 2026 sai nu’udar atividade transfronteirisa ida ne’ebé espera bele halo área fronteira la’ós de’it nu’udar liña ne’ebé haketak nasaun rua, maibé mós sai espasu enkontru entre komunidade sira ne’ebé hametin amizade Timor-Leste no Indonézia.
Jornalista: Cidalia Fátima
Editora : Armandina Moniz
