Cross Border Fest 2026 susesu hametin amizade Timor-Leste no Indonézia

ATAMBUA, 09 Agostu 2026 (TATOLI) – Garuda Sakti Cross Border Fest 2026 taka ofisiálmente iha Atambua, Kabupaten Belu, Nusa Tenggara Timur (NTT), sábadu (08/08) kalan, hafoin realiza durante loron lima ho envolve komunidade no partisipante sira husi Indonézia no Timor-Leste iha atividade oioin iha área turizmu, kultura, edukasaun no ekonomia kriativa.

Festivál ne’ebé realiza husi 04 to’o 08 Agostu ne’e konsidera susesu sai espasu atu hametin amizade no interasaun entre komunidade Timor-Leste no Indonézia, no iha tempu hanesan promove vizita turista no atividade ekonómika iha área fronteira.

Asistente Governasaun no Bem-Estar Sosial Sekretaria Rejionál Belu, Nikolaus Umbu K. Birri, hateten Garuda Sakti Cross Border Fest fó benefísiu ba komunidade tanba bele haburas sentimentu amizade, fraternidade, unidade no hamutuk entre komunidade nasaun rua.

“Ho atividade ida-ne’e, bele haburas sentimentu amizade, fraternidade, unidade no hamutuk entre nasaun rua, maibé hun ida, mak Indonézia, iha kazu ida-ne’e Kabupaten Belu, ho Timor-Leste,” Nikolaus hateten durante serimónia taka festivál.

Notisia relevante : Múzika hametin amizade TL no Indonézia iha Cross Border Fest 2026

Nikolaus hateten, durante realizasaun festivál, Atambua sai furak liután ho atividade oioin, hahú husi kompetisaun, partisipasaun delegasaun Timor-Leste, marxa saudavel, atividade ba estudante sira to’o edukasaun kona-ba Cinta, Bangga no Paham (CBP) Rupiah.

Nia subliña katak Garuda Sakti Cross Border Fest la’ós de’it selebrasaun ida, maibé mós reflete konfiansa Governu Sentrál ba Kabupaten Belu atu dezenvolve atividade iha área fronteira.

Governu Kabupaten Belu espera atividade ne’e bele realiza fali iha tinan oinmai ho apoiu husi Ministériu Turizmu no Bank Indonesia, no kontinua envolve komunidade Timor-Leste.

“Ami espera ho envolvimentu ida-ne’e bele aumenta liután sentimentu fraternidade no amizade entre nasaun rua,” nia dehan.

Nune’e mos Xefe Ekipa Eventu Kultura, Kriasaun no Karnavál Internasionál Ministériu Turizmu RI, Arya Galih Anindita, hateten realizasaun Garuda Sakti Cross Border Fest hatudu katak atividade ida la’ós de’it bele sai meiu entretenimentu no promove vizita turista husi Timor-Leste ka husi área sira seluk besik Kabupaten Belu.

Tuir nia, atividade ne’e mós sai meiu edukasaun, fó espasu ba operadór negosiante kiik sira atu halo inovasaun, hametin kooperasaun entre nasaun, preserva kultura no fó impaktu ekonómiku ba Kabupaten Belu.

“Ami espera katak espíritu kolaborasaun ne’ebé harii ona liuhusi Garuda Sakti Cross Border Fest ida-ne’e bele kontinua no dezenvolve liután, nune’e atividade ida-ne’e bele sai ajenda unggulan iha área fronteira no hametin liután amizade entre Indonézia no Timor-Leste,” Arya hateten.

Durante realizasaun festivál, envolvimentu Timor-Leste bele haree mós liuhusi kompetisaun korál ne’ebé halibur grupu sira husi nasaun rua.

Timor-Leste reprezenta husi Grupu Koru Santa Cecilia Balide husi Arkidioseze Dili no Grupu Koru Parókia Santo António Lacluta husi Dioseze Baucau. Iha kompetisaun refere, Santa Cecilia Balide sai kampiaun daruak, enkuantu Parókia Santo António Lacluta okupa pozisaun dalima.

Prezensa partisipante sira husi nasaun rua liuhusi arte no kultura sai nu’udar forma ida husi interasaun komunidade transfronteirisa ne’ebé espera bele kontinua hametin relasaun Timor-Leste no Indonézia.

Entretantu, Vise Xefe Reprezentante Bank Indonesia Provinsia NTT, Alvin Ari Wijayanto, hateten Bank Indonesia mós aproveita festivál refere nu’udar espasu atu fó edukasaun ba komunidade, liuliu kona-ba Cinta, Bangga no Paham Rupiah.

Durante festivál, Bank Indonesia realiza atividade oioin, inklui Pojok Literasi CBP Rupiah, edukasaun kona-ba utilizasaun Rupiah, QRIS no protesaun ba konsumidór, no mós disponibiliza kareta biblioteka LiteraMove atu hasa’e literasia komunidade iha área fronteira.

Tuir Alvin, prezensa Bank Indonesia iha Garuda Sakti Cross Border Fest mós sai parte husi esforsu atu apoia ekonomia no iha tempu hanesan mantein soberania Rupiah iha territóriu Indonézia.

Aspetu ida-ne’e konsidera importante tanba Atambua sai nu’udar área oin-liu Indonézia ne’ebé iha fronteira direta ho Timor-Leste no iha atividade ekonómika transfronteirisa.

Bank Indonesia mós enkoraja komunidade Timor-Leste ne’ebé vizita Atambua atu troka dólar iha operadór troka moeda estranjeira ne’ebé rejistadu antes halo tranzasaun ho Rupiah.

“Osan Rupiah la’ós de’it instrumentu tranzasaun legál, maibé mós símbolu soberania NKRI ne’ebé ita hotu tenke proteje hamutuk,” Alvin hateten.

Aleinde edukasaun, festivál mós aprezenta merkadu UMKM no merkadu ho folin asesivel, ne’ebé fó espasu ba operadór negósiu lokál sira atu promove sira-nia produtu no iha tempu hanesan movimenta atividade ekonómika komunidade.

Alvin konsidera susesu realizasaun festivál ne’e la bele haketak husi sinerjia entre Governu Kabupaten Belu, Ministériu Turizmu, Bank Indonesia, Forkopimda, reprezentante Timor-Leste, operadór UMKM, komunidade arte, profesór, estudante, media no komisaun organizadora.

Garuda Sakti Cross Border Fest 2026 aprezenta série atividade oioin, hahú husi kompetisaun koru, atividade no kompetisaun ba estudante sira, edukasaun Rupiah, marxa saúde, merkadu ho folin asesivel, bazar UMKM to’o espetákulu arte no entretenimentu.

Liuhusi susesu realizasaun festivál iha tinan ida-ne’e, Governu Kabupaten Belu no Ministériu Turizmu espera Garuda Sakti Cross Border Fest bele realiza fali no kontinua dezenvolve nu’udar ajenda unggulan iha área fronteira ne’ebé fó benefísiu ekonómiku, aumenta vizita turista no hametin amizade entre komunidade Timor-Leste no Indonézia.

Jornalista : Cidalia Fátima

Reporter  : Armandina Moniz