Komisaun A hetan referénsia husi Tailándia kona-ba kriasaun Lei Siberkrime
DILI, 10 Agostu 2026 (TATOLI) – Komisaun A Parlamentu Nasionál, ne’ebé trata Asuntu Konstitusionál no Justisa, durante vizita traballu bá Tailándia, hetan referénsia husi entidade relevante sira kona-ba kriasaun lei hodi kombate krime sibernétika, regulasaun dijitál no protesaun dadus.
Vizita ne’e hala’o husi loron 02 to’o 07 Agostu iha Bangkok, Tailándia, no kontinua bá Manila, Filipina, husi loron 08-13 Agostu tinan ne’e.
Vizita bá Bangkok-Tailándia lidera husi Prezidente Komisaun A, deputadu Natalino dos Santos Nascimento, ne’ebé akompaña husi membru delegasaun na’in-ualu, inklui asessór no tékniku sira.
Iha Bangkok, Komisaun halo vizita dahuluk bá Ajénsia Dezenvolvimentu Tranzasaun Elektrónika (ETDA) hodi fahe esperiénsia kona-ba knaar ajénsia nian, ne’ebé bele sai referénsia ba Komisaun iha prodús lei kona-ba regulasaun plataforma dijitál, tranzasaun elektrónika no governasaun ba artifisiál intelijénsia (AI).
Diretóra ETDA, Chalitda Madhyamapurush, aprezenta kona-ba regulasaun plataforma dijitál, tranzasaun elektrónika no governasaun IA. Durante enkontru, deputadu sira hato’o mós pergunta kona-ba knaar ajénsia ne’e, nu’udar referénsia ba Timor-Leste.
Tuir komunikadu ne’ebé Tatoli asesu ohin, delegasaun kontinua enkontru ho Kámara Reprezentante – Komisaun ba Asuntu Jurídiku no Direitu Umanu, simu husi Prezidente Kámara, Rangsiman Rome, no Vise-Prezidente, Pyyarat Chongthep.
Komisaun A hala’o enkontru ho Senadu Tailándia, ho objetivu atu hetan referénsia kona-ba kriasaun lei hodi kombate krime sibernétika, hametin soerania dijitál liuhusi infraestrutura siberseguransa ne’ebé reziliente no garante privasidade sidadaun liuhusi fahe prátika di’ak kona-ba regulamentu no fiskalizasaun protesaun dadus pesoál.
Hafoin ne’e, delegasaun kontinua enkontru ho Ajénsia Radiodifuzaun Nasionál no Komisaun Telekomunikasaun, hodi hetan referénsia kona-ba regulasaun setór telekomunikasaun no implementasaun lei kona-ba protesaun dadus pesoál.
Komisaun A mós hala’o enkontru ho Ajénsia Nasionál Siberseguransa (NCSA) Bangkok, ne’ebé simu diretamente husi Adjuntu Sekretáriu-Jerál ba Asuntu Polítiku, Pol. Col. Siriphon Kusonsinwu. Iha sorumutu ne’e, NCSA aprezenta análize kona-ba protesaun infraestrutura krítika ba informasaun.
Prezidente Komisaun A agradese ba entidade NCSA ne’ebé fahe ona esperiénsia ba Timor-Leste, nu’udar nasaun foun ne’ebé foin integra iha ASEAN.
Komisaun mós hala’o enkontru ho ASEAN-Japan Cybersecurity Capacity Building Centre (AJCCBC), simu husi Sekretáriu-Jerál, Air Vice Marshal Amon Chomchoey. Durante enkontru, entidade ne’e aprezenta análize kona-ba modelu formasaun téknika rejionál ne’ebé jere ho parseria JICA.
Hafoin remata vizita traballu iha Tailándia, delegasaun kontinua bá Manila, Filipina,
Tuir ajenda ne’ebé iha, delegasaun sei hala’o vizita no enkontru ho Kámara Reprezentante Filipina nian, no ho Komité Inter-Ajénsia Siberseguransa Nasionál (NCIAC).
Enkontru hirak ne’e iha objetivu mak atu deputadu sira komprende di’ak liután kona-ba siberseguransa, krime sibernétika, protesaun dadus, no intelijénsia artifisiál, molok produs lei ne’ebé ligadu ba matéria hirak ne’e.
Notísia relevante: Komisaun A vizita Filipina no Tailándia hodi halo estudu komparativu ba implementasaun Lei Sibernétika
Jornalista: Nelson de Sousa
Editora: Maria Auxiliadora
