Komunidade uma-kain 18 realoka ona ba sira-nia hela fatin iha foho Builó okos
VIKEKE, 10 Agostu 2026 (TATOLI)—Xefe Suku Ossorua, Postu Ossú, Munisípiu Vikeke, Eduardo A. Freitas, informa komunidade uma-kain 18 ne’ebé afetada husi foho Builó realoka ona ba sira-nia hela fatin.
“Kona-ba ita-nia komunidade husi Suku Ossorua ne’ebé hela iha foho Builo nia okos, akontese rai-nakdoko iha loron 07 Juñu ne’e, autoridade sira deside evakua tiha bá Suku Builó. Maibé, situasaun rai nakdoko normál fali, nune’e agora daudaun ne’e ita-nia komunidade deside fila bá sira-nia hela fatin ka uma iha foho Builó okos,” Eduardo A. Freitas ba TATOLI iha Postu Ossú, Segunda ne’e.
Notísia relevante: IGTL foti ona amostra iha foho Builó lori bá teste
Autoridade Ossorua ne’e hatutan molok realoka komunidade sira-ne’e, komunidade isin di’ak mak ba uluk hodi observa situasaun foho, maibé la akontese ona rai nakdoko.
“Entaun, ita-nia komunidade avasanda mós ba tuir hotu ona, ne’ebé sira bá sira-nia uma iha fulan-Jullu. Tanba ita-nia komunidade iha toos ka plantasaun no animál entaun sira deside fila,” nia haktuir.
Eduardo informa maski komunidade deside fila ba sira hela fatin, karik natureza akontese rai-nakdoko filafali, evakua hikas.
“Ita-nia komunidade ba fali sira-nia hela fatin, maibé akontese fali rai nakdoko ita buka dalan evakua fali, tanba natureza ne’e ita lahatene. Agora, situasaun ne’ebá la’o normál, rai mós la nakdoko ona ne’ebé di’ak ona,” nia hato’o.
Iha fatin ketak, Autoridade Protesaun Sivíl (APC–sigla portugeza) Munisípiu Vikeke, Cerílio Soares Gomes, haktuir antes ne’e autoridade sira enkontru hamutuk ho afetadu sira kona-ba realokasaun komunidade ba fali sira-nia hela fatin.
“Tanba situasaun rai-nakdoko normál hikas, loloos ami mak lori sira bá. Maibé, situasaun udan entaun karreta labele asesu ba foho Builó nia okos,” nia subliña.
Relembra fali katak akontesimentu rai-nakdoko ne’e akontese iha Domingu (07/06) dadeersan maizumenus tuku 7h30 afeta ba foho Builó hamosu rai monu iha foho Builó. Husi akontesimentu referidu la afeta ba komunidade no la estragu komunidade nia uma, maibé halo komunidade sai trauma.
Jornalista: Vitorino Lopes da Costa
Editór: Xisto Freitas da Piedade
