PNTL Oekusi halo uluk inspesaun dokumentu membru sira-nian molok pasa-revista iha públiku
OEKUSI, 10 Agostu 2026 (TATOLI) – Komandu Polísia Nasionál Timor-Leste (PNTL) liuhusi Sesaun Tránzitu Rodoviáriu Rejiaun Administrativa Espesiál Oekusi Ambenu (RAEOA), segunda ohin, hala’o inspesaun jerál ba dokumentu transporte públiku no privadu ne’ebé utiliza husi membru polísia sira.
Asaun interna ne’e hala’o ho objetivu atu garante kumprimentu lei antes hala’o pasa-revista (check-point) ba komunidade iha fatin públiku.
Komandante PNTL Rejiaun Oekusi, Superintandente Xefe Polísia Nicolau Francelino da Costa, hateten katak inspesaun interna ne’e hanesan pasu atu haforsa disiplina no responsabilidade rigoroza ba membru polísia sira nu’udar aparellu seguransa Estadu nian.
“Inspesaun ne’e vigora ba membru sira hotu. Sira tenke iha dokumentu kompletu ba karreta no motorizada. Jestu ne’ebé ami halo hahú kedas husi Komandu PNTL no sei kontinua to’o iha baze,” Komandante Nicolau deklara iha Kuartél PNTL Oekusi, ohin.
Notísia relevante:Janeiru-Abríl, PNTL Oekusi arrekada reseita ba kofre Estadu rihun $6-resin
Enkuadramentu legál no sansaun administrativa
Aliñada ho Kódigu Estrada Timor-Leste (Decreto-Lei n.º 6/2003) ne’ebé regula sirkulasaun veíkulu no lisensa kondusaun, hamutuk ho Regulamentu Atribuisaun no Uzu Veíklu Estadu nian (Decreto-Lei n.º 8/2003), Komandu PNTL Oekusi adota toleránsia zero (zero tolerance) ba infratór sira maske ho estatutu membru polísia.
Membru sira ne’ebé la iha xapa-matrákula, dokumentu veíklu kaduka, ka la iha Karta Kondusaun, sira-nia transporte sei hapara provizoriamente iha komandu. Transporte sira ne’e sei libertadu no bele utiliza fali bainhira kumpre ona regulamentu no selu sansaun administrativu (multa) ba kofre Estadu.
“Ami halo inspesaun interna ne’e sen toleránsia. Deteta balun nia karta kondusaun data kaduka no balun seidauk iha. Parte tránzitu aplika kedas sansaun tuir lei. PNTL maka tenke hatudu imajen no ezemplu di’ak ba públiku atu banati tuir,” nia subliña.
Rezultadu inspesaun dahuluk
Iha operasaun inspesaun dahuluk ne’e, Sesaun Tránzitu PNTL Oekusi konsege verifika motorizada 30-resin no karreta lima (5), ne’ebé husi ne’e deteta membru na’in-hitu (7) komete infraasaun administratik tanba dokumentu transporte no karta kondusaun kaduka. Membru sira-ne’e atualmente submete daudaun ba prosesu legál no aplika sansaun tuir regulamentu tránzitu ne’ebé vigora.
Komandu PNTL Oekusi reafirma katak operasaun inspesaun ne’e sei hala’o beibeik no foin kontinua ho pasa-revista rigorozu ba populasaun no transporte públiku iha territóriu RAEOA tomak.
Notísia relevante:Lidera PNTL Oekusi, Komandante Nicolau prioriza asuntu haat ho akumulativu
Jornalista: Abílio Elo Nini
Editór: Rafael Ximenes de A. Belo
