SEKoop lansa produtu Bafo iha EBC 04 Kaizu-Laran Vikeke
VIKEKE, 11 Agostu (TATOLI)—Sekretáriu Estadu Kooperativa (SEKoop), Arsénio Pereira, hamutuk ho Autoridade Munisípiu Vikeke, Tersa ne’e, lansa produtu Bafo Kay Rala iha Ensinu Báziku Sentrál (EBC-sigla portugeza), Suku Bahalarauain, Postu Vikeke Vila.
Objetivu husi lansamentu produtu Bafo ne’e atu integra hamutuk ho menu programa merenda eskolár ne’ebé implementa ona iha kada eskola sira.
Iha lansamentu ne’e, Arsénio haktuir, kona-ba programa lansamentu podutu Bafo Kay Rala ida-ne’e sai hanesan programa promosaun ida ba eskola sira tanba programa husi Governu Bafo Kay Rala sai progroma primária ne’ebé orienta ba merenda eskolár.
“Tan ne’e, ita ohin mai lansa iha eskola EBC 04 Kaizu-Laran, ita oferese produtu Bafo Kay Rala ne’ebé prodús ona ba produtu hanesan sasoro, dose, krupuk no seluk tan ba ita-nia oan sira konsume. Ha’u rekoñese maski ita lansa ona, maibé iha Vikeke ita-nia produtu ne’e kuantidade sei menus tanba produtu ne’e dalabarak ema seidauk koñese di’ak no seidauk toman konsume produtu ida-ne’e,” Arsénio hateten iha resintu EBC 04 Kaizu-Laran.
Governante ne’e subliña lansamentu ida-ne’e SEKoop hakarak promove ba estudante sira hodi koñese no toman an konsume produtu Bafo Kay Rala, tanba iha nutrisaun di’ak ba labarik sira no ba ema boot sira.
“Produtu Bafo ne’e ita konsume la halo ita obesidade, la halo ita bokur demais, maibé halo ita-nia nutrisaun sai di’ak. Produtu ne’e, ita sei kontinua promove no ha’u husu ba komunidade Munisípiu Vikeke ita servisu hamutuk hodi hasa’e produsaun Bafo Kay Rala,” nia hato’o.
Iha fatin hanesan, Sekretáriu Munisípiu Vikeke asuntu sosiál no organizasaun, Acásio de Sousa, hato’o agradesimentu ba SEKoop ne’ebé ho inisiativa di’ak lansa produtu Bafo Kay Rala iha Munisípiu Vikeke, bá-oin sei promove produtu ida-ne’e hodi fornese ba programa merenda eskolár.
“Ha’u sente Sekretáriu Estadu Kooperativa iha inisiativa ida-ne’ebé di’ak tebes hodi hili Munisípiu Vikeke ba lansamentu Bafo Kay Rala. Ami sei orienta autoridade sira no komunidade hodi hasa’e kuantidade hodi fornese ba programa merenda eskolár, tanba produtu ida-ne’e iha valór di’ak ita bele prodús sai hahán no bele sai tua,” nia hato’o.
Iha biban hanesan, Diretór Edukasaun Munisípiu Vikeke, Antônio Pinto da Silva, hateten maski lansa ona produtu Bafo Kay Rala, maibé produtu referidu iha Munisípiu Vikeke ema seidauk kuda barak.
“Entaun ita labele implementa iha programa merenda eskolár, tanba agora produtu ida-ne’e ema ladún kuda. Karik bá-oin mak iha ona produtu Bafo Kay Rala ita bele sosa hodi tama programa merenda eskolár, la’ós loroloron maibé kada semana estudante sira konsume dala ida,” nia afirma.
Iha okaziaun ne’e, Estudala Terseiru Siklu EBC 04 Kaizu-Laran, Yoan Fernande, sente orgullu tanba SEKoop mai oferese produtu Bafo Kay Rala ba estudante sira hodi konsume iha EBC 04 Kaizu-Laran.
“Bafo Kay Rala ne’ebé ohin ami han sente di’ak tebes. Ami hakarak bá-oin han nafatin Bafo Kay Rala ne’ebé ohin ami han ne’e tanba di’ak loos,” nia haktuir.
Kona-ba produtu Bafo Kay rala iha valór ekonómiku, sosiál, no ambientál ne’ebé aas. Nia benefísiu prinsipál mak hanesan matéria-prima ba indústria, ai-han no merenda eskolár, apoiu ba negósiu lokál, no hamenus depedénsia ba produtu estranjeiru ne’ebé fó rendimentu ba povu. Benefisiu ekonómiku no merkadu fó rendimentu ba maluk kamponéz no produtór lokál sira, nune’e bele uza hanesan matéria-prima ba indústria serveja, bebida alkólika, panifikasaun,no kosmétika.
Benefisiu seluk ba ai-han no saúde integra iha programa merenda eskolár hodi apoiu nutrisaun labarik sira nian. Produsaun ne’ebé di’ak bele kolleta dala rua to’o tolu iha tinan ida nia laran. Fornese ai-han ba animál no produsaun dosi lokál.
Entretantu, partisipa iha serimónia lansamentu produtu Bafo Kay Rala kompostu husi autoridade lokál, veteranu, profesór, Polísia Eskuadra Vikeke Vila, funsionáriu SEKoop nasionál no Munisípiu Vikeke no estudante sira husi EBC 04 Kaizu Laran.
SEKoop kolleta hudi ektare neen
Iha parte seluk, Sekretáriu Estadu Kooperativa, Arsénio Pereira, hamutuk ho Autoridade Munisípiu Vikeke kolleta hudi variedade mandár no singapura iha Suku Luka, Postu Vikeke Vila, Munisípiu Vikeke.
Kona-ba kolleta hudi ne’e, iha tinan 2025, SEKoop apoiu fundu subvensaun públika hamutuk rihun $7 ba Asosiasaun Servi Nodi Moris kuda hudi okupa rai ektare neen (6), ho totál hudi ne’ebé kuda hamutuk 3.750 ho distánsia 4 x 4, durasaun tinan ida.
Arsénio sente orgullu ba rezultadu hudi ne’ebé SEKoop hamutuk ho asosiasaun kuda iha tinan kotuk, maibé iha duni rezultadu ne’ebé ohin kolleta daudaun hodi faan ba konsumidór sira.
“Ha’u sente orgullu no kontente tebes ba rezultadu husi hudi ne’ebé ita kuda iha tinan kotuk no ohin ita mai fali kolleta. Tan ne’e, ha’u hato’o parabéns ba membru asosiasaun sira tanba sira esforsu bele hetan rezultadu ne’ebé di’ak,” Arsénio Pereira hateten ba jornalista sira hafoin kolleta hud, ohin.
Governante ne’e enkoraja Asosiasaun Servi Nodi Moris hodi kontinua dezenvolve produtu agríkola ba produtu seluk hanesan ne’ebé asosiasaun mehi hanesan kuda ai-dila kalifórnia, kuda Bafo Kay Rala, ortikultura inklui haki’ak manu no ikan sira hodi hadi’a ekonomia.
“Ha’u hanoin asosiasaun nafatin dezenvolve setór agrikultura tanba asosiasaun iha rai hamutuk ektare 25, entaun presiza nafatin kuda mós produtu seluk hodi hasa’e ita-nia rendimentu ekonomia,” nia hato’o.
Iha fatin hanesan, Prezidente Asosiasaun Servi Nodi Moris, Artur Xavier, hateten rezultadu kolleta hudi ne’e asosiasaun hetan fundu suvesaun públika husi SEKoop suporta ba atividade rua mak hanesan kuda hudi no ortikultura.
Nia relata membru Asosiasaun Servi Nodi Moris hamutuk na’in-15 kompostu husi mane na’in-sanulu (10) no feto hamutuk na’in-lima (5) ne’ebé daudaun ne’e sei ativu iha asosiasaun.
Entretantu, partisipa iha serimónia kolleta hudi ne’e kompostu husi Sekretáriu Munisípiu Vikeke Asuntu Sosiál, Segundu Komadante Polísia Eskuadra Vikeke Vila, funsionáriu SEKoop nasionál no munisípiu.
Jornalista: Vitorino Lopes da Costa
Editór: Xisto Freitas da Piedade
