Autoridade no komunidade apoia reabilitasaun estrada Lourba-Atsabe
BOBONARU, 12 Agostu 2026 (TATOLI)- Autoridade Postu Administrativu Bobonaru, lideransa komunitária no komunidade sira prontu atu apoia implementasaun projetu reabilitasaun estrada trosu husi suku Lourba, munisípiu Bobonaru, liga bá postu administrativu Atsabe, munisípiu Ermera.
Projetu estrada ne’e agora hela hela vistu husi Tribunál Administrativu no Finanseiru (Tribunal Kontas, hafoin selebra kontratu ho empreza internasionál Shanghai Construction Co. Ltd., no sei kontinua ho lansamentu fatuk dahuluk.
Administradór Postu Administrativu Bobonaru, Tomás Barreto Henriques, hatete katak autoridade lokál prontu atu koopera ho entidade kompetente sira hodi fasilita implementasaun projetu ne’e, tanba estrada ne’e importante tebes ba nesesidade komunidade nian.
Tomás afirma katak autoridade postu liuhusi enkontru apela ona ba xefe suku sira atu fó hatene ba komunidade hodi prepara-an simu projetu referidu, tanba obra ne’e sei lori benifísiu iha futuru.
“Ita-nia komunidade mós atu iha konxiénsia hodi simu ita nia obra ne’e, tanba ne’e ba sira. Ba futuru, estrada ne’e mak sai hanesan baze ida oinsá mak povu atu hadi’a ninia moris, lori produtu lokál bá merkadu”, nia dehan ba Tatoli, kuarta-feira ne’e.
Iha parte seluk, komunidade, António Pereira, prontu atu apoia projetu ne’e, inklui fó kontribuisaun ba ai-horis ka rai, tanba estrada ne’e presiza tebes hodi tulun atividade ekonomia no sosiál.
“Ami kontente no hein tebes estrada ne’e kle’ur ona, ne’ebé ami apoia másima tanba estrada ne’e mós sei fasilita ami-nia movimentu iha kualker tempu”, nia dehan.
António konsidera Pprojetu reabilitasaun estrada Lourba-Atsabe importante tanba sei fasilita koneksaun entre Bobonaru no Ermera, movimentu ema no sasán, no asesu komunidade bá merkadu no servisu sosiál.
“Tanba tinan 20-resin ona, ami iha parte Bobonaru no maluk sira iha sorin Atsabe ne’e halerik tebes, liuliu tempu udan, taho ho bee-nalihun fali iha estrada laran, balun to’o agora sei kotu hela. Ami sente susar tebetebes, tanba ami hakarak dezenvolvimentu mai iha ami-nia aldeia”, nia realsa.
Enkuantu, Xefe Suku Lourba, Lino da Cruz, rekomenda atu projetu reabilitasaun estrada ne’e aselera, tanba komunidade hein kle’ur ona. “Karik sistema ka administrasaun ida ne’ebé la loos, tenke hadi’a lalais, tanba prosesu estrada ne’e kle’ur liu ona. Fulan hitu liu ona to’o agora seidauk mai lansamentu”, nia lamenta.
Reabilitasaun estrada ne’e ho distánsia kilómetru 48,93 ho orsamentu hamutuk millaun $43,1-resin.
Notísia relevante: Estrada Kailaku-Lolotoe iha faze aprovizionamentu finál, Lourba-Atsabe hein implementasaun
Jornalista: Sergio da Cruz
Editora: Maria Auxiliadora
