Estudu viabilidade ba merkadu Manleuana no Taibesi finaliza 

DILI, 12 Agostu 2026 (TATOLI)-Ministru Komérsiu no Indústria, Filipus Nino Pereira, informa katak estudu viabilidade ba merkadu Manleuana no Taibesi finaliza ona, no agora kontinua ho preparasaun ba dezeñu detalladu.

Nia dehan katak estudu viabilidade ba konstrusaun merkadu Taibesi responsabiliza husi PT. Multi Karadiguna Jasa (Indonézia), iha konsórsiu ho empreza Salu Corporation Unipessoal Lda., no PT. Laminar Engineering Consultant (Indonézia). Enkuantu, estudu ba konstrusaun merkadu Manleuana hala’o husi PT. Metaforma Consultants (Indonézia), konsórsiu ho empreza Arcplen Consultant Unipessoal.

“Estudu viabilidade ba Sentru Komersiál Taibesi no Manleuana finaliza ona. Agora ita tama kedas ba estudu dezeñu. Entaun, tinan ne’e remata, tinan oin ita bele hahú ona konkursu públiku”, Nino Pereira adianta iha Palásiu Governu, ohin.

Estudu viabilidade ba merkadu rua ne’e hala’o iha tinan kotuk, ho orsamentu ba Manleuana rihun $215 no Taibesi rihun $241.

Aleinde ne’e, kona-ba estudu dezeñu detalladu ba merkadu haat iha munisípiu Bobonaru, Kovalima, Ainaru no Manufahi hotu ona. Iha tinan oin sei lansa ba konkursu públiku ba konstrusaun merkadu sira ne’e.

Notísia relevante: Negosiante husu Governu alarga merkadu Manleuana

Jornalista: Arminda Fonseca 

Editora: Maria Auxiliadora