PNTL detein suspeitu na’in-14 ba krime scam call center
DILI, 12 Agostu 2026 (TATOLI)–Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) halo operasaun konjunta iha Tersa (11/08) kalan no konsege detein sidadaun na’in-14 iha área ne’ebé la hanesan iha Dili.
Portavós PNTL, Superintendente Xefe Polísia João Belo, haktuir, ekipa konjunta horikalan hala’o operasaun iha fatin lubuk ida, nune’e konsege deteta sidadaun estrajeiru halo hela prátika scam call center ho fraglante delitu. Nune’e, iha momentu ne’ebá kedan ekipa halo buska no detensaun ba sidadaun estrajeiru sira.
“Primeiru iha área Santa Kruz, ekipa konjunta detein sidadaun estrajeiru na’in-lima, kompostu husi sidadaun Xina na’in-haat no sidadaun Indonézia ida,” João Belo hateten ba Jornalista sira iha ninia knaar fatin, Komandu Jerál PNTL, Kaikoli, Kuarta ne’e.
Ekipa halo apreensaun ba evidénsia hanesan starlink, komputadór, laptop unidade 17, desktop unidade rua, telefone Samsung no Iphone unidade 20.
“Daudaun kazu nee ami rejista ona NUK 0297/26.PNSIK,” nia akresenta.
Notísia relevante : Tribunál aplika kausaun $3.000 ba arguidu envolve atividade scam call Center iha Fatuhada
Ekipa Seguransa mós halo intervensaun iha área Vila-Verde, Aldeia Lemorai, Suku Vila-Verde, ba sidadaun estrajeiru hamutuk na’in-sia, kompostu husi sidadaun Xina na’in-ualu inklui sidadaun Vanuatu na’in-ida.
Iha momentu ne’e, ekipa halo apreensaun ba evidénsia sira hanesan aparellu Starlink rua, komputadór laptop unidade rua, inklui telemóvel rua.
“Kazu ne’e ami rejista ho NUK 0298/26.PNSIK. To’o iha oras ida-ne’e husi operasaun ne’ebé mak ami hahú iha 26 Jullu 2026, DSIK konsege desmantela scam call center hamutuk 18, ne’ebé envolve ema besik 400. Ami halo identifikasaun hodi aprezenta ona ba Tribunál,” nia informa.
Biban ne’e, João Belo husu ba Autoridade lokál no komunidade atu kolabora ho Polísia hodi prevene krime scam call center.
“Hanesan Polísia Nasionál Timor-Leste, apelu ne’ebé maka Sua Exelénsia Komandante Jerál husu apoiu ba komunidade, líder komunitária hanesan matan no liman Polísia nian karik identifika ema ruma halo movimentu iha sira-nia bairru laran, aluga sira-nia uma sira mak suspeita ligasaun ba krime ne’e rasik bele informa lalais ba ami, bele halo intervensaun. Ita labele fó fatin, ita-nia nasaun hanesan fatin zona grupu internasionál krime organoizadu, krime online nian ein relasaun halo operasaun iha ita-nia nasaun laran. Tanba ida-ne’e ladi’ak ba Timor-Leste nia seguransa no ladi’ak ba konunidade no seguransa ba ita-nia aparelu sira ne’ebé ita uza,” nia fó-hanoin.
Iha biban ne’e, Komandante João Belo hateten, kualker operasaun tantu buska, apreensaun no detensaun ne’ebé Polísia halo ba sidadaun estranjeiru iha Timor-Leste liga ho online scam sempre komunika ba nia Embaixada ne’ebé rezidente iha Timor-Leste.
“Kualkera operasaun buska no detensaun ne’ebé ita halo ba sidadaun sira ne’e, ita komunika ba sira-nia diplomata sira, katak ita-nian sidadaun ida iha ami-nia kontrolu nian. Ba nasaun sira ne’ebé mak nia reprezentante iha ne’e seidauk iha komunika ba MNEK bele komunika ba sira,” nia dehan.
To’o agora rejistu suspeitu ba kazu scam call center maioria mai husi Indonézia kompara ho nasaun sira seluk, tuir mai Xina, sidadaun pasífiku ida Vanuatu ne’ebé liuhusi operasaun horikalan mak foin kaer.
“suspeitu sira ne’e maioria mai ho vistu turizmu.”
Jornalista : Natalino Costa
Editora : Julia Chatarina
