Tribunál absolve Antigu Komandante Jerál na’in-rua husi kazu akizisaun farda no manutensaun ró
DILI, 12 Agostu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, hasai akordaun hodi absolve Antigu Komandante Jerál Polísia Nasionál Timor-Leste (PNTL) na’in-rua ho inisiál LM no HdC husi krime partisipasaun ekonomia iha negósiu, ba akizisaun farda no manutensaun Unidade Polísia Marrítima (UPM) iha tinan 2012.
Iha sala julgamentu, Juíz Argentino Nunes deklara, Tribunál hatún akordaun ne’e hodi deside absolve arguidu LM no HdC tanba faktus la provadu ba krime ne’ebé Ministeriu Públiku (MP) imputa ba sira.
Arguidu na’in-rua seluk ho inisiál CRdCS nu’udar Inspetora Jerál iha Gabinete Inspesaun Auditoria iha Sekretaria Estadu Seguransa (SES) iha tinan 2012 no arguidu JC nu’udar Diretór Nasionál Aprovizionamentu iha SES.
Notísia relevante : Kazu fornesimentu farda no manutensaun ró, MP husu Tribunál deside tuir konvikasaun
Tribunál iha nia desizaun fundamenta katak, maski faktus balun provadu hanesan farda UPM ne’ebé kompañia oferese laiha kualidade, maibé ema ida de’it mak halo kontestasaun enkuantu benefisiáriu sira seluk laiha, nune’e Tribunál koletivu haree katak la priense elementu krime.
Nune’e mós, faktus balun provadu ba kompañia, liga ho dokumentu lisensamentu ne’ebé mate, tuir loloos labele kualifikadu iha konkursu hodi halo manutesaun ba ró UPM, maibé Tribunál konsidera kestaun ne’e la’ós krime maibé kestaun administrativa.
Tribunál la konsidera faktus ne’ebé la aprovadu hanesan arguidu sira laiha intesaun atu fó vantajen ba ema seluk nomós fó vantajen mós ba arguidu sira-nia an, laiha mós prejuizu ba Estadu, tanba ne’e koletivu haree la prense elementu krime ne’ebé mak Ministériu Públiku (MP) akuza ba arguida sira.
Tribunál mós deklara ba arguidu rua seluk hanesan FdG nu’udar Sekretáriu Estadu Seguransa iha tinan 2012 no arguidu AJ hanesan Antigu Adjuntu Komandante Jerál, ne’ebé Tribunál sei halo separasaun prosesu tuir artigu 25 husi Kódigu Penál Timor-Leste. Durante julgamentu sira la partisipa, aleinde ne’e sira mós asume hela kargu balun.
Akuzasaun
Tuir MP nia akuzasaun, kazu ne’e akontese iha tinan 2011, bainhira arguidu sira halo adjudikasaun direita ba kompañia Linio Unipessoal Lda hodi forense fardamentu Polísia Marrítima Timor-Leste ho tipu 21 ba membru na’in-150 ho karater urjente.
Maski nune’e, kompañia ne’e la prense rekezitu atu halo adjudikasaun direita tanba dokumentu inválidu ona. Arguidu sira nafatin fó fiar ba kompañia hodi fornese fardamentu Polísia Marrítima ho totál orsamentu $117.762. Maibé uniforme ne’e laiha kualidade tanba membru sira uza la kleur unifome ne’e a’at ona.
Iha akuzasaun, sita katak bainhira membru sira informa kona-ba kualidade uniforme, iha hela prazu garantia nian, maibé arguidu sira la informa ba kompañia, nune’e arguidu ida ne’ebé nu’udar Diretór kompañia nafatin simu osan husi Governu ho totál $117.762.
Aleinde ne’e, iha tinan hanesan, arguidu sira mós halo adjudikasaun direita ba kompañia Linio Unipessoal atu halo manutensaun ba Ró NRTL Dili no Hera (unidade rua) ho totál kontratu $150.000.
Maski kompañia laiha esperiénsia nomós mekánika espesializadu ba manutensaun ró maibé kontinua aseita hodi fó impaktu ró rua ne’e labele hala’o operasaun to’o agora.
Husi arguidu sira-nia hahalok, hamosu prejuizu ba Estadu no montante globál $34.500. Ho nune’e, MP akuza arguidu sira ho krime partisipasaun ekonomia iha negósiu.
Jornalista : Natalino Costa
Editora : Julia Chatarina
