ANP atribui sertifikadu Báziku Soldadura Internasionál ba formadór na’in-ulau

 DILI, 13 Agostu 2026 (TATOLI) – Autoridade Nasionál Petróleu (ANP) emite Sertifikadu Báziku Soldadura Internasionál (IWI-B) ba formadór sira ne’ebé partisipa ona treinamentu soldadura nian iha Sentru Nasionál Empregu no Formasaun Profisionál (CNEFP, sigla portugés) Tíbar, Likisá, durante semana neen.

Vise-Prezidente ANP, Quintino Pereira, hatete sertifikasaun Inspetór Báziku Soldadura Internasionál (IWI-B), nu’udar kualifikasaun prestijiadu, ne’ebé permite sira atu fó sai Sertifikadu ISO 9606 iha Soldadura, nune’e hasa’e sira-nia perísia profisionál no kontribui ba padraun indústria nian.

Quintino Pereira dehan treinamentu ne’e hala’o tanba iha kolaborasaun serbisu ho programa ida ne’ebé hetan apoiu husi Timor-Leste Australia Energy Partnership (TLAEP), no Department of Industry, Science and Resources (DISR) ne’ebé apoia programa ida-ne’e implementa iha Timor-Leste.

Nia dehan treinamentu ne’e rasik hahú husi módulu no treinadór sira mai husi Austrália mak fó kursu ba treinadór sira husi Sentru Formasaun ka Eskola Tékniku Vokasionál sira ne’ebé Institutu Dezenvolvimentu Mão-de-Obra (INDIMO) akredita.

Formadór sira ne’ebé tuir treinamentu kona-ba Training of Trainers ne’e hamutuk na’in-sanulu, maibé ikus mai na’in-ualu de’it pasa ka hetan sertifikadu soldadura internasionál nian.

“Formadór sira ne’e, ita prepara sira atu sai treinadór profisionál ba soldadura nian iha Timor-Leste iha sira-nia sentru formasaun ka Eskola Vokasionál sira. Nune’e, bainhira estudante foun sira ne’ebé hakarak tuir formasaun kona-ba soldadura nian sira iha ona esperiénsia bele hanorin sira tanba iha ona sertifikadu”, Quintino Pereira hatete.

Nia esplika katak treinamentu ne’e realiza tanba parseria TLAEP lidera husi Departamentu Indústria, Siénsia no Rekursu (DISR) Austrália nian no Autoridade Nasional Petróleu (ANP) Timor-Leste nian. Parseria ne’e estabelese iha tinan 2022 hodi aprofunda koñesimentu, komérsiu no investimentu entre Timor-Leste no Austrália iha setór rekursu sira.

Parseria ne’e apoia negósiu, instituisaun no vizita delegadu Governu entre Timor-Leste no Austrália hodi fahe koñesimentu, harii ligasaun indústria, hametin relasaun negósiu no akadémika; no harii kapasidade forsa traballu iha setór rekursu Timor-Leste nian.

Parseria ne’e mós iha dalan haat mak Governu ba Govemu, Formasaun ba Formadór sira, Negósiu no Akademia.

Formadór Duarte da Costa husi ESTV Bekora agradese ba oportunidade tanba tuir ona treinamentu soldadura nian durante fulan neen husi ANP. “Ida-ne’e oportunidade di’ak, ami aproveita tebes no ami fila sei hanorin ami-nia estudante sira, liuliu módulu sira ne’ebé ami aprende ona husi formadór sira husi Austrália”, nia garante.

Formasaun ne’e aprende kona-ba prosedimentu soldadura no rekizitu avaliasaun nian ne’ebé aliña ho AS/NZS/ISO 9606, treinamentu intensivu ne’ebé kombina komponente inspesaun teóriku no prátiku, no seluk tan.

Totál formadór na’in-ualu ne’ebé hetan sertifikadu mak Jose Amaral husi Sentru Nasionál Empregu no Formasaun Profissionál (CNEFP, sigla portugés) Tíbar, Likisá, Jacinta Correia, husi Sentru Nasionál Empregu Formasaun Profisionál (CNEFP) Bansone, Oekusi, Francisco José Gusmão husi CNEFP Bekora, Nelson Soares Maco husi Dom Bosco Komoro, Dili, Vitoriano de Sousa husi Dom Bosco Fatumaka, Baukau, Simão Maia husi Ensinu Sekundáriu Tékniku Volasionál (ESTV) 1 de Lospalos, Duarte da Costa husi ESTV Bekora, Dili, no Suizilio de Castro, husi Universidadae Nasionál Timor Lorosa’e.

Jornalista: Arminda Fonseca

Editora: Maria Auxiliadora