Deputada lamenta ema deskoñesidu sunu rai iha Kristu Rei no husu reforsa kontrolu
DILI, 13 Agostu 2026 (TATOLI) – Deputada husi Partidu Kongresu Nasionál Rekonstrusaun Timorense (CNRT, sigla portugés), Virgínia Ana Belo, preokupa ho ema deskuñesidu ne’ebé sunu rai iha área Kristu Rei no ai-han rai kuaze ektare rua, iha domingu foin lalais ne’e.
Tanba ne’e, nia solisita ba parte Autoridade Munisípiu Dili (AMD) no Sekretaria Estadu Floresta (SEF) atu reforsa kontrolu.
Nia dehan katak Kristu Rei nu’udar fatin turizmu relijiozu ne’ebé sai íkone iha kapitál país ne’e, no Governu kria ona instalasaun hirak iha ne’ebá, entaun presiza asegura ninia paizajen, inklui ho ninia Floresta sira
“Tenke tau seguransa, CCTV atu kontrola no kuandu deteta ema, aplika sansaun hanesan koima ho lei ruma ne’ebé iha”, nia levanta iha Parlamentu Nasionál, ohin.
Aleinde ne’e, nia hatete aktu sunu rai arbiru husi ema irresponsavel iha área hanesan Kristu-Rei no fatin seluk hamosu preokupasaun boot, tanba estraga ekosistema, aumenta temperatura manas, no ameasa biodiversidade.
Hodi apela nafatin ba sidadaun sira atu uza konxiénsia hodi hapara hahalok sunu rai halo iha tempu bailoro naruk.
Nia sujere mós ba SEF atu reforsa sensibilizasaun ba komunidade hodi hatene importánsia ambiente nian, aumenta númeru guarda florestál, no implementa sansaun ba ema sunu rai arbiru, kontinua fó prioridade atu prezerva no promove rekursu floresta no halo jestaun sustentavel, hametin konservasaun no jestaun ekosistema floresta, redús regradasaun no deflorestasaun ba rai.
Nomós kontinua promove reflorestasaun iha área risku sira no kontinua programa agrofloresta.
Notísia relevante: SEF husu ema hotu uza konxiénsia atu labele sunu rai
Jornalista: Nelson de Sousa
Editora: Maria Auxiliadora
