Komisaun C aprende prátika di’ak Tailándia kona-ba fiskalizasaun finansa públika
DILI, 13 Agostu 2026 (TATOLI) – Komisaun C ne’ebé Trata Asuntu Finansa Públika iha Parlamentu Nasionál, durante vizita traballu bá Tailándia, hetan referénsia husi entidade relevante sira kona-ba mekanizmu no prátika di’ak iha fiskalizasaun parlamentár kona-ba finansa públika.
Vizita ne’e hala’o iha sesta-feira semana kotuk, ne’ebé lidera husi Prezidente Komisaun, Cedelízia Faria dos Santos, akompaña husi membru sira, ne’ebé hetan apoiu husi Uniaun Europeia (UE), liuhusi projetu Apoiu ba Integrasaun Rejionál no Komérsiu iha Timor-Leste, ne’ebé implementa husi International Trade Centre (ITC), koopera ho Thailand International Cooperation Agency (TICA).
Vizita estudu ne’e ho objetivu atu hametin kapasidade fiskalizasaun parlamentár no aumenta koñesimentu kona-ba jestaun finansa públika nian.
Tuir komunikadu ne’ebé Tatoli asesu, katak durante vizita delegasaun hala’o enkontru no sesaun troka koñesimentu ho instituisaun parlamentár no governamentál sira iha Tailándia, inklui Asembleia Nasionál Tailándia, Sekretariadu ASEAN Inter-Parliamentary Assembly (AIPA), Departamentu Kontroladór-Jerál, Gabinete Kombate Brankeamentu Kapitál no Gabinete Orsamentu.
Delegasaun mós realiza vizita kortezia ba Vise-Presidente Daruak Asembleia Nasionál Tailándia.
Diskusaun no aprendizajen durante vizita ne’e konsentra liuliu ba mekanizmu no prátika di’ak iha fiskalizasaun parlamentár kona-ba finansa públika, preparasaun no ezekusaun orsamentál, jestaun despeza públika, responsabilizasaun finanseira, jestaun fiskál, no prevensaun no kombate brankeamentu kapitál.
Delegasaun mós hetan oportunidade atu aprende husi esperiénsia Tailándia kona-ba orsamentasaun bazeia ba rezultadu, planeamentu fiskál ba médiu prazu no dijitaliza iha jestaun finansa públika. “Esperiénsia sira-ne’e oferese aprendizajen importante ba Timor-Leste, liuliu iha esforsu atu kontinua hadi’a mekanizmu fiskalizasaun parlamentár, transparénsia, responsabilizasaun no efisiénsia iha jestaun rekursu públiku”, nota ne’e dehan.
Komisaun konsidera vizita ne’e la’ós de’it oportunidade atu aprende husi esperiénsia nasaun seluk, maibé mós sai pasu importante atu hametin kooperasaun no relasaun institusionál entre Timor-Leste no Tailándia, liuhusi diálogu, partilla koñesimentu no troka prátika di’ak iha área parlamentár no governasaun.
Kooperasaun ida-ne’e mós aliña ho esforsu Timor-Leste atu hametin instituisaun demokrátika, promove governasaun di’ak, aumenta transparénsia no responsabilizasaun iha jestaun públika, no kontinua kontribui ba prosesu integrasaun no kooperasaun rejionál.
Notísia relevante: Komisaun A hetan referénsia husi Tailándia kona-ba kriasaun Lei Siberkrime
Jornalista: Nelson de Sousa
Editora: Maria Auxiliadora
