Konstrusaun refeitória ba EBC 04 Agostu Kaizu-Laran iha progresu
VIKEKE, 13 Agostu 2026 (TATOLI)—Diretór Ensinu Báziku Sentrál (EBC-sigla portugeza) 04 Agostu Kaizu-Laran, João Viana Soares, informa progresu fíziku konstrusaun refeitória ne’ebé Diresaun Munisipál Programa Nasionál Dezenvolvimentu Suku (PNDS) konstrui daudaun ne’e progresu atinje ona 75%.
“Kona-ba progresu konstrusaun refeitória ba estudante sira daudaun ita-nia traballadór sira servisu atinje ona 75%. Hein taka kalén bele konklui ona tanba besi badaen sira tula sa’e hotu ona,” João ba TATOLI iha Suku Bahalaraua’in, Vikeke Vila, Kinta ne’e.
Nia relata progresu fíziku ne’ebé daudaun ne’e atinjidu mak hanesan fondasi husi rai, cor sinta rai, hada bloku, cor sinta leten. Depoiz reboka hotu, kuda-kuda uma nian monta hotu ona, hela kalén mak seidauk.
“Refeitóriu ne’e iha kuartu rua no sala han nian fatin ida. Fulan-Setembru hanesan ne’e bele konklui ona. Ha’u sente uma ne’e bainhira konklui sei ajuda ami tanba durante ne’e estudante sira han merenda eskolár tenke ba túr iha saladeaula laran mak han, no balun hamrik de’it iha li’ur mak han,” João informa.
Nia hato’o agradesimentu ba PNDS tanba tau ona planu ba refeitóriu ba eskola sira hodi benefísia estudante ensinu báziku ne’ebé implementa programa merenda eskolár.
Tuir dadus, EBC 04 Kaizu-Laran kompostu primeiru síklu, segundu síklu no terseiru síklu ho totál estudante hamutuk na’in-700.
Fó hanoin fali katak refeitóriu ne’e lansa husi Prezidente Autoridade Munisípiu Vikeke, Francisco C. S de G. Soares, loron 08 Juñu 2026 ho durasaun fulan tolu, konstrui husi Empreza Caniela Unipessoal, Lda ho medida 8×14, orsamentu husi PNDS ho montante $14.000.00.
Jornalista: Vitorino Lopes da Costa
Editór: Xisto Freitas da Piedade
