Konstrusaun saladeaula tolu iha EBF Oe-leu konklui
BOBONARU, 13 Agostu 2026 (TATOLI)-Konstrusaun saladeaula tolu iha Eskola Bázika Filiál (EBF) Oe-leu, iha postu administrativu Bobonaru, finaliza ona hafoin paradu tiha iha tinan 2024.
Xefe Suku Oe-leu, Januário Meta Tae Bragança ‘Buka-Maluk’, konfirma katak obra ne’e kontinua ho orsamentu husi Programa Nasionál Dezenvolvimentu Suku (PNDS) siklu da-neen tinan 2026, tanba orsamentu 2024 filafali ba kofre Estadu ho razaun atraza iha prosesu loke kuotasaun, nune’e implika ba konstrusaun obra no la konsege finaliza iha fulan-Dezembru.
“Nia la’o fulan ida de’it tama 31 Dezembru remata. Ita-nia osan fila tanba lei mak hatete hanesan ne’e, ne’ebé foin daudauk iha Juñu nia laran loke kuotasaun ba materiál kontrusaun, badaen sira kontinua serbisu iha 15 Juñu no agora sira esforsu halo serbisu fulan ida-resin de’it remata ona”, nia informa ohin.
Iha sorin seluk, Koordenadór EBF Oe-leu, Eurico de Araújo Loesina ‘Besi-Asu’, konsidera ho aumenta saladeaula foun ne’e, ba oin espasu sufisiente ona atu akumula estudante husi primeiru no segundu siklu.
“Husi primeiru to’o sestu anu, ami tama dadeer hotu ona, laiha ona turnu dadeer no loraik hanesan agora, tanba sala tolu de’it”, nia dehan.
Eurico afirma katak dirjente eskola sira mós hato’o ona pedidu ba Ministériu Edukasaun atu apoia tan mobiliáriu eskolá ba sala foun tolu ne’e.
Notísia relevante: Konstrusaun eskola EBF Dom Mauloe suku Oe-leu paradu
“Falta mak kadeira ho meza. Ami presiza meza 100 ho kadeira 100, tanba ami-nia alunu 176 bele hala’o ensinu no aprendizajen ho di’ak iha fatin ne’ebé seguru”, katak.
Totál orsamentu ne’ebé utiliza hodi kontinua finaliza obra ne’e hamutuk $20.722,10. Aleinde ne’e, orsamentu siklu neen tinan 2026 mós utiliza hodi halo reabilitasaun estrada iha aldeia Mologen.
Notísia relevante: EPE Oe-leu tama lista prioridade ba konsturusaun iha 2027
Jornalista: Sergio da Cruz
Editora: Maria Auxiliadora
