MJDAK-FDATL diskute planu Festivál Akadémia ba universidade sira iha TL
DILI, 13 Agostu 2026 (TATOLI)—Ministériu Juventude, Desportu, Arte no Kultura (MJDAK) hamutuk ho Federasaun Akadémia Timor-Leste (FDATL) diskute planu realizasaun Festivál Akadémia ba universidade sira iha Timor-Leste.
Ministériu Juventude, Desportu, Arte no Kultura (MJDAK), Nelyo Isaac Sarmento, hateten kompetisaun Festivál Akadémia sei realiza dala ida iha tinan rua no iha oportunidade ba munisípiu sira halo selesaun, no kompetisaun iha Dili tenke akontese kada tinan.
“Kompetisaun ne’e sei realiza dala ida iha tinan rua-rua. Ita fó oportunidade ba munisípiu sira halo seleksaun, no iha Dili kompetisaun tenke akontese kada tinan. Governu iha obrigasaun atu finansia atividade ne’e,” Ministru Nelyo hateten iha reuniaun ne’ebé hala’o iha Salaun Magna MJDAK, Lecidere, kinta ne’e.
Nia subliña katak dezenvolvimentu desportu labele depende de’it ba Governu. Tanba ne’e, kolaborasaun ho eskola no universidade importante tebes atu hasa’e prestíjiu akadémiku no fó fatin ba estudante sira atu dezenvolve la’ós de’it siénsia maibé mós prátika fízika.
“Dezenvolvimentu desportu labele depende de’it husi Governu. Kolaborasaun ho eskola no universidade importante tebes atu hasa’e prestíjiu akadémiku no fó fatin ba estudante sira dezenvolve la’ós de’it siénsia maibé mós prátika fízika,” nia dehan.
Festivál ne’e objetivu atu fó espasu ba estudante universidade sira hodi hatudu sira nia talentu iha área desportu no arte, nune’e mós promove espíritu saudavel no kompetisaun pozitivu entre instituisaun ensinu superiór sira iha Timor-Leste.
Jornalista : Hortêncio Sanchez
Editór : Cancio Ximenes
