Sidadaun estranjeiru na’in-10 viola vistu
DILI, 13 Agostu 2026 (TATOLI)–Ekipa Servisu Migrasaun (SM), Kinta kalan ne’e, asegura sidadaun estranjeiru feto na’in-10 tanba halo violasaun vistu, ne’ebé sira tama Timor-Leste ho vistu turizmu maibé halo serbisu.
Tuir nota ne’ebé Ajénsia TATOLI asesu, husi Sistema Jestaun Fronteira nia verifikasaun, deteta katak iha sidadaun estranjeiru na’in-hitu halo violasaun ba vistu tanba sira uza vistu turizmu hodi hala’o fali atividade komersiál iha otél balun iha área Bairru-Pité no Hudi-laran.
Enkuantu, na’in-tolu seluk maski ho vistu traballu, maibé uza vistu la tuir fatin serbisu nian.
Notísia relevante : Servisu Migrasaun asegura sidadaun estranjeiru na’in-lima tanba halo violasaun ba vistu
Informasaun husi ekipa operasaun hatudu katak sidadaun estranjeiru hirak ne’e uza sala vistu hodi buka lukru, ne’ebé la tuir objetivu no kondisaun vistu ne’ebé fó ba sira.
Sidadaun estranjeiru na’in-10 agora hela iha kontrolu Servisu Migrasaun atu halo verifikasaun no prosesa tuir prosedimentu lei migrasaun ne’ebé vigora iha Timor-Leste.
Servisu Migrasaun kontinua halo fiskalizasaun ba sidadaun estranjeiru atu asegura kumprimentu ba regra migrasaun inklui uza vistu tuir objetivu ne’ebé autorizadu no la halo atividade ne’ebé kontra lei Migrasaun Timor-Leste nian.
Jornalista : Natalino Costa
Editora : Julia Chatarina
