Servisu Migrasaun asegura sidadaun estranjeiru na’in-lima tanba halo violasaun ba vistu
DILI 11 Agostu 2026 (TATOLI)–Ekipa Servisu Operasaun husi Servisu Migrasaun hala’o atividade operasaun iha Tersa kalan, ne’ebé iha operasaun ne’e konsege asegura sidadaun estranjeiru na’in-lima iha fatin karaoke sira iha área Hudi-Laran tanba halo violasaun ba vistu.
Tuir nota ne’ebé Ajénsia TATOLI asesu, sidadaun estranjeru hirak ne’e ho inisiál LRA, ISA, PO, DH no ARP uza vistu turizmu hodi halo fali atividade komersiál.
Nune’e, bainhira simu informasaun, Servisu Migrasaun hamutuk ho ekipa Makikit halo kedan operasaun tama-sai otelaria no fatin karaoke iha Kapitál Dili laran, hodi halo fiskalizasaun no inspesaun ba sidadaun estranjeru sira no konsege asegura sidadaun estrajeiru feto nain lima ne’ebé halo duni violasaun ba vistu.
Notísia relevante : Servisu Migrasaun entrega hikas xineza na’in-rua ne’ebé tama lista mean INTERPOL
Iha operasaun ne’e, ekipa Servisu Migrasaun haree liuba pasaporte no violasaun vistu tanba tuir Sistema Jestaun Fronteira nian detekta katak sidadaun hirak ne’e vistu mate ona, nune’e ekipa servisu halo planu operasaun hudi buka tuir to’o konsege hetan iha área Dili Oeste nian.
Iha prosesu identifikasaun, investigadór Servisu Migrasaun nian notifika katak maioria sidadaun estranjeiru sira ne’e uza vistu turista hodi buka fali serbisu, nune’e sira konsidera halo violasaun ba Lei Migrasaun no Azilu, iha artigu 143 no aplika sansaun multa.
Sidadaun estranjeiru ne’ebé rekuza sei submete naran ba iha Ministériu Públiku atu prosesa tuir lei.
Jornalista : Natalino Costa
Editora : Julia Chatarina
