Konsellu Polisiamentu Komunitáriu nia serbisu la’ós atu kaer ema
DILI, 04 Novembru 2026 (TATOLI)–Komandante Komandu Polísia Nasionál Timor-Leste (PNTL) Munisípiu Dili, Komisáriu Asistente Polísia Orlando Gomes, hateten, Konsellu Polisiamentu Komunitáriu (KPK) nia serbisu la’ós atu bá kaer ema, maibé fó informasaun ba Polísia hodi prevene krime iha suku no bairru sira.
“Akontesimentu sira ne’e ba pasa, maibé mai iha tempu agora molok sira tomada de pose iha formasaun, ita esplika klaru sira-nia funsaun katak iha serbisu balun ne’ebé sira labele halo, pur ezemplu sira só apoiu de’it Polísia atu halo kapturasaun, prosesu, buat hotu ne’e Polísia nia kompeténsia, sira só ajuda de’it Polísia oinsá mak bele halo patrullamentu, ronda, no fó informasaun mai atu nune’e fó seguransa ho diak, mas Polísia mak halo atuasaun, KPK retira,” Komisáriu Orlanadu hateten ba Jornalista sira iha nia knaar fatin, Eskuadra Dom Aleixo, Kuarta ne’e.
Notísia relevante : Membru na’in-500 Konsellu Polisiamentu Komunitária simu pose
Nia esplika, KPK nia serbisu daudaun la hanesan uluk, PNTL fó serbisu ba sira to’o tuku 23:00 kalan de’it, labele liu.
“Polísia mak halo sira-nia serbisu atu nune’e sira labele halo fali serbisu ne’ebé halo komunidade la satisfáz, sira halo serbisu tenke bazeia ba orientasaun Komandu,” nia akresenta.
Aleinde ne’e, durante formasaun iha regulamentu balun ne’ebé mak regula membru sira, bainhira halo krime ka kontra regulamentu ne’ebé estabelese mak Prezidente KPK no Ofisiál Polisiamentu Suku (OPS) halo suspensaun.
“Labele hanesan pasadu ne’ebé sira la’o mesak, halo grupu boot halo ema tauk no balun kaer fali ema. Sidadaun hotu bele halo impedimentu ba sé de’it mak halo krime maibé sukat kbiit la to’o, nia labele tama tanba orsida bele prejudika nia-an rasik. Tanba ne’e sempre la’o ho Komandu Ofisiál Polisiamentu Suku para hamutuk orienta nafatin sira halo serbisu tuir orientasaun loloos atu nune’e komunidade bele satisfáz ho sira-nia serbisu,” nia tenik.
Polísia sempre husu KPK nia apoiu iha loron boot hanesan finadu, natal, loron nasionál no internasionál, vizita Amu Papa no misa boot sira.
“Tanba ne’e mak ita atu halo prevensaun ba ida-ne’e. Foin daudaun ita halo serbisu hamutuk ho Polisiamentu Komunitáriu no Prezidente KRAM, ita tama eskola sira hodi ko’alia kona-ba sidadania prevensaun konflitu,” nia katak.
Komisáriu Asistente Polísia Orlando hatutan: “Foin daudaun ita halo tomada de pose ba Suku iha kapitál Dili ne’e kompleta ona para hamutuk ho ita-nia Polísia Suku sira hamutuk ho Xefe Suku atu reforsa apoiu kontinuasaun ba Polísia nia serbisu hamutuk tanba sira mak reprezenta komunidade nia serbisu hamutuk ho Polísia atu nune’e ajuda sira iha tempu saida ita bele presiza apoia Polísia hodi halo patrullamentu.”
Nia haktuir, foin daudaun finadu ne’e KPK hamutuk ho OPS sira kontrola sira oinsá maka orienta saida mak sira bele halo no saida mak sira labele halo.
“Sira tau seguransa hamutuk ho OPS sira atu nune’e kada suku mak tau rasik seguransa, ne’ebé ita utiliza sira ba tempu finadu no ba futuru Konsellu Polisiamentu Komunitáriu organizadu no estruturadu, entaun ita sempre uza sira atu nune’e iha loron eventu boot pur ezemplu natal ho tinan foun ka iha festivál ruma, iha atividade boot ruma Konsellu Polisiamentu Komunitáriu bele apoiu hodi halo ronda iha suku laran, liuliu utiliza sira maka’as iha tempu kalan,” nia hato’o.
Jornalista : Natalino Costa
Editora : Julia Chatarina
