Servisu Migrasaun entrega hikas xineza na’in-rua ne’ebé tama lista mean INTERPOL
DILI 04 Agostu 2026 (TATOLI)–Servisu Migrasaun entrega hikas sidadaun Xina na’in-rua ne’ebé tama lista mean (Red Notice) husi International Police (INTERPOL), hafoin Autoridade Seguransa kaptura no entrega fali ba Interpol Repúlika Populár Xina.
“Fujitivu ZX tama lista INTERPOL tanba envolve iha fraude no korrupsaun, enkuantu NB envolve-an hodi organiza no responsabiliza ba atividade prostituisaun,” referidu nota husi pájina Relasaun Públika Ministériu Interiór, ne’ebé Ajénsia TATOLI asesu, Tersa ne’e.
Notísia reelvante : Estadu membru ASEAN aseita halo estradisaun ba kualker fujitivu
Tanba atividade kriminál ne’e, suspeitu na’in-rua identifikadu hanesan kriminozu nível a’as ne’ebé tama iha lista mean husi INTERPOL Beijing, nune’e autoridade kompetente halo kolaborasaun internasionál atu lokaliza no halo apreensaun ba suspeitu sira hodi lori sira ba prosesu legál tuir lei.
Iha okaziaun ne’e, Diretór Ezekutivu Servisu Migrasaun, Komisáriu Asistente Polísia Jorge Monteiro, hamutuk ho Diretór Jerál, Diretór Nasionál nomós Xefi Gabinete halo kedas auto-entrega transferénsia ba INTERPOL Beijing nian, nu’udar parte husi kooperasaun membru INTERPOL atu garante prosesu legál no hasa’e kooperasaun internasionál iha kombate krime transnasionál.
Hafoin ekipa INTERPOL ho Servisu Migrasaun konklui prosesu tomak iha sede sentrál Vila-Verde, autoridade nasaun rua ne’e lori kedas fujitivu sira ne’ebé suspeita envolve iha kazu krime burla internasionál hodi bá sa’e aviaun Aero Dili iha Aeroportu Internasionál Nicolau Lobato, Komoro, nune’e bele fila bá sira-nia nasaun orijen.
Jornalista : Natalino Costa
Editora : Julia Chatarina
