PNTL detein suspeitu haat envolve krime durante selebrasaun finandu iha Dili
DILI, 04 Novembru 2026 (TATOLI)–Komandante Komandu Polísia Nasionál Timor-Leste (PNTL) Munisípiu Dili, Komisáriu Asistente Polísia Orlando Gomes, informa, durante selebrasaun finadu PNTL rejista kazu haat iha Dili.
Krime haat ne’e mak hanesan violénsia doméstika iha Bedois Bekora no Santa Krús, ofensa simples iha Raikotu no Metinaru inklui koasaun seksuál ne’ebe akontese iha Dom Aleixo no kazu ameasa arma branka iha Kulau Bekora inklui kazu furtu agravadu ne’ebé Ailok-Laran.
“Durante finadu ita detein suspeitu haat ba kazu hirak ne’ebé ha’u temi. Ita detein supeitu haat ba 72 oras, ita prosesa, ita prepara ona auto-notísia hodi aprezenta ba Ministériu Públiku maibé kazu sira ne’e laiha relasaun ho finadu, ne’e kazu indivíduu,” Komisáriu Orlandu hateten ba jornalista sira iha nia knaar fatin, Eskuadra Dom Aleixo, Kuarta ne’e.
Notísia relevante : Xanana Gusmão kontente povu selebra loron finadu ho hakmatek
Nia dehan, durante loron finadu PNTL mós halo identifikasaun ba sidadaun ida durante oras 12 tanba nia ho kondisaun lanu, maibé depoizde ida-ne’e husik nia fila bá uma.
“Ita kompara ho tinan sira uluk bainhira finadu ita detein suspeitu besik 10 to’o 20, maibé tinan ida-ne’e ita halo serbisu maka’as, ita-nia membru sira ita halo alerta um no orden Komandu nian ita hotu-hotu kumpre para apoiu malu hodi ita garante seguransa ba loron finadu ne’e lao di’ak no susesu,” nia akresenta.
Louva komunidade iha Dili
Komisáriu Asistente Polísia Orlando Gomes louva komunidade iha Dili nia maturidade durante selebrasaun finadu ne’ebé la’o iha ámbitu tránkilidade no laiha violénsia hodi perturba orden públika.
“Komandu fó agradesimentu tanba ita hotu nia responsablidade ba rai, ita hakarak hadomi ita-nia rai ita ho konsiénsia rasik, tane ita-nia rai, hadomi ita-nia rai mak ohin loron ita hotu nia kontribuisaun ida-ne’e mak iha tinan ida-ne’e situasaun seguransa hotu bele la’o di’ak tanba ita-boot sira-nia kontribuisaun tomak. Durante finadu ita-nia situasaun seguransa ne’e di’ak no laiha perturbasaun orden públika iha semitériu sira,” nia katak.
Komisáriu nota maski joven sira balun mak konsumu alkól maibé kuandu Autoridade Seguransa sira fó hanoin, sira bele kumpre orden.
“Komandu Munispiu Dili fó apresiasaun no agradesimentu ba ita-nia parte hotu, liuliu komunidade no joven sira, Konsellu Polisiamentu Komunitária, Forsa Defeza, Unidade Espesiál Polísia, Unidade Polísia Marrítima ho Forsa fronteira sira hotu ne’ebé mak apoiu tomak,” nia katak.
Orlando Gomes hatutan, durante loron-rua família sira vizita semitériu sunu lilin no situasaun di’ak tanba preparativu husi komandu Munisípiu Dili ne’ebé koloka membru iha semitériu sira ho situasaun kontroladu.
Planu operasaun ne’e objetivu atu prevene konflitu iha semitériu sira hodi garante orden no seguransa públika durante atividade relijioza, kontrollu atividade komunidade iha zona risku ba konflitu, hametin koordenasaun seguransa sira, proteje vida no propriedade komunidade.
Nia dehan, seguransa durante selebrasaun finadu hetan apoiu mos husi Konsellu Polisiamentu Komuntáriu ne’ebé hetan apoiu husi suku sira iha Dili laran inklui komunidade. Tanba ne’e hahú husi loron 01-02 Novembru situasaun seguransa la’o hakmatek, laiha perturbasaun orden públika ruma no laiha akontesimentu iha semitériu sira iha kapitál Dili tomak.
Aleinde ne’e, Komandu Munisípiu Dili monta postu hitu iha zona risku sira nune’e konsege halo prevensaun krime.
“Durante komunidade hamos rate iha semitériu to’o kari ai-funan ita nafatin koloka ita-nia membru iha ne’ebá atu asegura atividade sira ne’e no koloka sira tau-matan ba movimentu transporte sira hodi fasilita ema ba mai labele halo engarafamentu no asidente iha semitériu sira no ida-ne’e la’o di’ak duni,” nia tenik.
Jornalista : Natalino Costa
Editora : Julia Chatarina
