Xanana Gusmão kontente povu selebra loron finadu ho hakmatek
DILI, 04 Novembru 2026 (TATOLI)–Primeiru-Ministru, Kay Rala Xanana Gusmão, hateten nia ho Prezidente Repúblika sente kontente tanba povu tomak selebra Loron Finadu ka loron Matebian sira-nian ho pás no laiha insidente ruma mak akontese.
“Ha’u ho Prezidente Repúblika kontente tanba iha finadu la akontese buat ruma, ema hotu selebra loron matebian ho pás,” Xanana Gusmão hatete ba jornalista sira hafoin hala’o enkontru semanál ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pite, ohin. .
Xefe Governu ne’e hatutan, iha selebrasaun ne’e povu hotu-hotu ba husu matebian sira atu fó tulun hodi sai sidadaun ne’ebé-di’ak.
“Hotu-hotu ba husu matebian sira atu fó tulun ita hodi sai sidadaun di’ak iha nasaun ne’e, Prezidente Repúblika fó apresiasaun liuliu joven sira-ne’ebé kontribui tebes ba pás,” nia dehan.
Entretantu, Primeiru-Ministru husu ba sidadaun hotu atu kontinua mantein pás hodi kontribui ba dezenvolvimentu nasionál.
“Ita nafatin kontinua hanesan ne’e hodi kontribui ba pás no dezenvolve ita-nia nasaun ba oin, mantein hakmatek nafatin hanesan ne’e,” nia dehan.
Jornalista : Hortêncio Sanchez
Editór : Cancio Ximenes
