CMCLN Baukau orgullu ho Selebrasaun Loron FALINTIL ba da-51 hala’o iha Matebian
BAUKAU, 14 Agostu 2026 (TATOLI)—Konsellu Munisipál Kombatente Libertasaun Nasionál (CMCLN-sigla Portugeza) Baukau sente orgullu tanba Selebrasaun Loron Nasionál Forsa Armada Libertasaun Nasionál Timor-Leste (FALINTIL) ba da-51 realiza iha Foho Matebian.
Sekretáriu Jerál CMCLN Baukau, Roberto Carlos da Costa, hateten desizaun komemora loron ne’e iha foho Matebian tanba relasiona ho istória ne’ebé konsiderada nu’udár fatin sentru baze apoia, konsentrasaun lutadór sira hodi organiza funu inklui sai sasin ba memória hotu bainhira luta ba ukun rasik-an.
Notísia relevante: Preparasaun Selebrasaun Loron FALINTIL ba da-51 iha progresu
“Hanesan veteranu sente orgullu ida ba Baukau tanba nu’udár fatin istóriku. Hili Matebian sai fatin serimónia tanba akontesimentu barak iha-ne’ebá. Ida-ne’e sai reflesaun ba ita hotu liuliu hahú husi Matebian mak sai inísiu ba reorganizasaun luta libertasaun,” Sekretáriu Jerál CMCLN Baukau hateten iha ninia kna’ar fatin, Vila Antiga, Baukau, Sesta ne’e.
Kombatente ne’e relata tuir orientasaun husi nasionál, CMCLN kada munisípiu sei reprezenta pesoál na’in-lima hodi partisipa iha serimónia ofisiál ne’ebé sei realiza iha Suku Abu, Postu Administrativu Matebian, iha semana-oin, Kinta 20 Agostu 2026.
Nune’e, CMCLN Baukau apela ba Kombatente Libertasaun Nasionál sira espesiál ba antigu gerrilleiru FALINTIL iha Baukau, jeografiamente besik fatin serimónia hanesan Postu Administrativu Laga, Kelikai Antigu, Kelikai, Matebian no Baguia atu ho vontade rasik partisipa iha loron istóriku referidu.
“Ha’u fiar katak mezmu idade avansada ona maibé ita-nia aman sira nafatin iha korajen atu rai ida-ne’e hetan prósperu iha futuru,” Roberto Carlos akresenta.
Nia fundamenta, gerrilleiru FALINTIL nu’udár liman-kroat povu nian iha tempu luta iha-ne’ebé kontribui an tomak to’o balun lakon. Hosi selebrasaun tinan-ne’e hakarak husu atu kontinua sai mahon ba jerasaun foun sira liuliu konsolida forsa hodi hametin soberania Timor-Leste.
CMCLN Baukau mós iha esperansa ba jerasaun foun sira atu banati tuir FALINTIL sira hodi hasa’e espíritu nasionalizmu nune’e kontribui ba dezenvolvementu liuhusi kria pás no estabilidade.
Entretantu, Selebrasaun Loron Nasionál FALINTIL tinan-ne’e realiza ba da-51 ne’ebé sei hala’o iha foho Matebian iha área Sobasula, Suku Abu, Postu Administrativu Matebian. Preparasaun atualmente atinje ona pursentu 50-resin.
Jornalista: Natalino Belo
Editór: Xisto Freitas da Piedade
