FC S’Amuser prepara jogadór 25 ba kompete Jogu Asia Championship iha Tailándia

DILI, 14 Agostu 2026 (TATOLI)—Konsellu Fiskál Klube FC S’Amuser, Mateus Ferrão Pinto hateten Klube S’Amuser prepara Jogadór 25 ba kompete Jogu Asia Championship (AFC Women’s Champions League) iha Tailándia.

Jogu iha Tailándia sei halo iha semana ida, hahú iha 17 Agostu 2026, tuku 19:00 (oras Tailándia), jogu segundu sei hala’o iha 20 Agostu tuku 16:00 no jogu terseiru iha 23 Agostu, tuku 19:00.

“Iha-ne’ebá mak ita iha Pool D hamutuk ho klube husi Tailándia, Mongolia no Korea Norte. Nune’e, ohin ami mai hamutuk iha-ne’e hasoru-malu ho Ministru Juventude, Desportu, Arte no Kultura  (MJDAK) tanba MJDAK mak suporta ami. Entaun ami mai halo despedida no ita iha jogadór hamutuk iha 25 no mós ho ofisiál no delegasaun hamutuk 37, ne’ebé sei aranka bá iha Tailándia aban,” nia dehan ba TATOLI, iha edifísiu MJDAK, Sesta ne’e.

Mateus informa, ba iha Champinship ne’e idade livre, mínimu mak 15, maibé sira laiha kritériu tanba futeból feto sira fó prioridade liu nune’e mós hatudu talentu jogadór sira-nian ba mundu.

Klube FC S’Amuser harii iha 2018. Liafuan S’Amuser ne’e signifika kontente no jogadór hamutuk 23 maibé suporta husi jogadór Indonézia nian na’in tolu (3) mak reforsa no iha mós jogadór naturalizasaun ida maibé nia joga iha Akademia Inglaterra.

Apoiu ba klube ne’e mak emprezáriu lokál, MJDAK, Federasaun, Aero Dili no My GYM hodi halo preparasaun.

Iha fatin hanesan, Ministru Juventude, Desportu, Arte no Kultura, Nelyo Isaac Sarmento, hateten klube ida-ne’e mak kampeonatu primeiru divizaun feto nian ne’ebé atu bá partisipa iha Jogu Asia Championship (AFC Women’s Champions League).

“Ita espera reprezentante husi Timor-Leste mak sira no ha’u espera katak sira hatudu buat ruma iha-ne’ebá. Ida-ne’e ita haudu katak feto mós bele. Oportundiade eskluziva mak ne’e, fó oportunidade ba feto atu hatudu sira-nia kapasidade iha bola no ha’u dezeja ba S’Amuser organiza aan di’ak ba, partisipa nafatin iha eventu, lori alin sira ho di’ak depoiz hodi aprende la’ós atu manán de’it maibé buka atu aprende, buka mós entende ema nia dezenvolvimentu futeboll no klube, nune’e ita mós aban bainrua iha klube sira-ne’ebé di’ak no fó fasildiade di’ak ba klube sira,” nia tenik.

Jornalista: Osória Marques

Editór: Xisto Freitas da Piedade