Pelican Paradise la konkorda ho Rezolusaun Governu kona-ba entrega fali rai ba Estadu
DILI, 14 Agostu 2026 (TATOLI)-Empreza Pelican Paradise diskorda ho rezolusaun Governu nian kona-ba devolusaun rai sira ne’ebé fó ona ba sosiedade Pelican Paradise Group Limited atu halo konstrusaun otél estrela iha Tíbar ba fali Estadu.
Pelican Paradise fó sai deklarasaun ofisiál katak Kompromisu Kontratuál Pelican Paradise simu ona ho atensaun rezolusaun ne’ebé Governu Timor-Leste hasai kona-ba sira-nia projetu investimentu iha Tasi Tolu no Tíbar.
“Ami la konkorda ho maneira ne’ebé asuntu ida-ne’e deskreve hanesan buat ida neʼebé bele rezolve simplesmente liuhusi Rezolusaun Governu nian ne’ebé haruka filafali rai investimentu nian”, haktuir deklarasaun ofisiál Grupu Pelican Paradise.
Razaun empreza la konkorda ho rezolusaun Governu nian, tanba Pelican Paradise tama iha Akordu Espesiál kona-ba Investimentu ne’ebé formál no legalmente vinkulativu ho Estadu Timor-Leste iha loron 03 Janeiru 2022. Akordu ne’e, estabelese obrigasaun entre parte rua.
Tuir Pelican Paradise, Relasaun kontratuál ida labele redús de’it ba desizaun Governu nian kona-ba dezempeñu parte ida nian, enkuantu la konsidera obrigasaun ne’ebé parte seluk asume ona.
“Pelican Paradise gasta ona maizumenus tinan 18 serbisu hamutuk ho Governu Timor-Leste tuituir malu hodi dezenvolve projetu ne’e. Durante períodu ne’ebá, ami investe rekursu finanseiru signifikativu, halo planeamentu no dezeñu, kompleta obra preparatória substansiál sira no hahú atividade konstrusaun sira”, haktuir komunikadu ne’ebé Tatoli asesu ohin:
Hodi dehan projetu ne’e hasoru ona atrazu signifikativu, inklui asuntu sira ne’ebé relasiona ho infraestrutura no obrigasaun sira seluk ne’ebé nu’udar responsabilidade Estadu nian tuir kuadru investimentu nian. Asuntu sira-ne’e hatete no hato’o beibeik ona ba autoridade relevante sira iha tinan barak nia laran.
Tanba ne’e, la loos atu aprezenta istória Pelican Paradise nian hanesan de’it investidór ida ne’ebé la kumpre nia promesa sira. Obrigasaun kontratuál hothotu iha parte rua. Obrigasaun investidór nian labele ezamina ketak husi obrigasaun Estadu nian.
Empreza ne’e respeita Governu Timor-Leste no autoridade husi ninia instituisaun sira. Maibé, respeitu ba autoridade Governu nian tenke la’o hamutuk ho respeitu ba Estadu direitu, serteza kontratuál no boa fé.
Governu rasik antes ne’e rekoñese ona Akordu Investimentu Espesiál nu’udar enkuadramentu legál ne’ebé regula investimentu ne’e. Akordu ne’e asina formalmente hosi reprezentante sira husi Estadu no Pelican Paradise. Deskreve publikamente iha momentu ne’ebá hanesan pasu importante ida ba oin ba projetu ne’e, ne’ebé fó sai husi (TATOLI – Ajénsia Notiziosa Timor-Leste).
“Tanba ne’e, ami fiar katak públiku merese konta ida ne’ebé kompletu no ekilibradu kona-ba saida maka akontese iha tinan 18 ikus ne’e, inklui obrigasaun sira ne’ebé parte rua ne’e halo no razaun sira tanba saida maka projetu ne’e hetan atrazu sira”, katak.
Pelican Paradise sei kontinua depende ba faktu sira; rejistu dokumentál no akordu sira ne’ebé halo ho Estadu no sei la responde liuhusi atake pesoál ka retórika polítika.
“Ita-nia kompromisu ba Timor-Leste durante ne’e la nakdoko. Saida maka iha jogu maka prinsípiu ida ne’ebé luan liu: bainhira Estadu ida tama iha akordu investimentu ida ne’ebé vinkulativu, investidór sira tenke fiar katak kompromisu sira ne’ebé Estadu halo sei hetan respeitu”, dehan.
Nota ne’e dehan importante la’ós de’it ba Pelican Paradise, maibé ba investidór doméstiku no internasionál hothotu ne’ebé konsidera Timor-Leste hanesan fatin ida atu investe. Pelican kompromete nafatin ba Timor-Leste no atu rezolve asuntu ne’e ho justu, transparente no tuir kompromisu sira.
Relasiona ho asuntu ne’e, jornalista Tatoli tenta halo entrevista ho Vise-Primeiru-Ministru, Ministru Koordenadór ba Asuntu Ekonómiku, Francisco Kalbuadi Lay, maibé nia parte lakohi fó komentáriu.
“Kona-ba asuntu Pelican Paradise tempu seluk mak ita ko’alia”, Kalbuadi hateten.
Notisía Timor-Leste: https://tatoli.tl/2026/08/12/governu-deside-entrega-fali-rai-pelican-paradise-tibar-ba-estadu/
Jornalista: Arminda Fonseca
Editora: Maria Auxiliadora
