Governu deside entrega fali rai Pelican Paradise Tibar ba Estadu
DILI, 12 Agostu 2026 (TATOLI)—Governu liuhusi reuniaun Konsellu Ministru, kuarta ne’e, aprova rezolusaun Governu hodi devolusaun rai sira-ne’ebé fó ona ba sosiedade Pelican Paradise Group Limited atu halo konstrusaun otél estrela iha Tibar atu entrega ba fali Estadu.
Proposta ne’e aprezenta husi husi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, no Konsellu Ministru aprova proposta Rezolusaun Governu refere iha ámbitu Akordu Espesiál Investimentu (AEI) relevante, ne’ebé aprova liuhusi Rezolusaun Governu númeru 133/2021, loron 15 fulan-Dezembru.
Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, konsidera katak AEI refere remata ona ninia efeitu no ninia terminasaun komunika ona ba empreza, rai sira ne’ebé fó ona iha ámbitu investimentu ne’e tenke entrega fila-fali ba Estadu hanesan na’in.
Nune’e, nia dehan, rezolusaun ne’e fó knaar ba Vise-Primeiru-Ministru no Ministru Koordenadór Asuntu Ekonómiku atu promove no koordena asaun nesesáriu hodi asegura restituisaun (entrega) fila fali rai ba Estadu, ne’ebé tenke entrega ho kondisaun livre husi ema no propriedade sira.
Rezolusaun ne’e determina mós katak entidade públika relevante hotu, iha ámbitu sira-nia kompeténsia, tenke adota aktu administrativu nesesáriu hodi kumpre desizaun ne’e.
Jornalista : Alexandra da Costa
Editór : Cancio Ximenes
