PM Xanana observa progresu projetu rabilitasaun estrada Urahou ba Turiskai
AINARU, 14 Agostu 2026 (TATOLI)— Primeiru-Ministru, Kay Rala Xanana Gusmão, akompañadu husi Ministru Obra Públika, Samuel Marçal, halo observasaun hodi haree progresu projetu reabilitasaun estrada ligasaun Urahou-Maubisse-Ainaro ba Postu Administrativu Turiskai, Munisípiu Manufahi ho kilómetru 12 hodi haree ninia progresu.
Ministru Obra Públika, Samuel Marçal, hateten katak nia mak konvida Primeiru-Ministru hodi halo observasaun ba estrada husi Urahou-Maubisse ba Turiskai-Manufahi
“Iha observasaun hatudu katak estrada ne’e la’o kle’ur uitoan tamba parte Turiskai no Ainaru udan nunka para no sira-nia materiál mós susar tamba sira tenke ba foti fali iha Same (Manufahi), entaun progresu ne’e tarde uitoan,” Ministru Obra Públika, Samuel Marçal, hateten, Ministru informa ba jornalista sira iha Ainaru, ohin.
Governante ne’e hatutan, kona-ba rai monu ne’e la fó impaktu maka’as maibé impaktu ida-ne’ebé maka’as liu mak husi klima no materiál.
“Maibé projetu ne’e atinje kuazé 60%, tanba iha kilómetru haat (4) mak tau tiha ona alkatraun, daudaun ne’e kompañia sira halo base course ba kilómetru ualu (8) ne’ebé sei tau alkatraun iha tempu badak. Signifika katak hela de’it kilómetru sia (9) hodi kompleta ona to’o iha Turiskai laran,” nia dehan.
Tanba ne’e, nia husu ba kompañia atu aselera servisu hodi konklui obra ne’e iha fulan-Dezembru nia laran, agora kestaun kona-ba estrada urbana iha Turiskai laran ne’e meadu 2027 mak foin bele konklui.
Obra ne’e kaer husi empreza lokál Montana Diak bazeia ba akordu neʼebé selebra iha loron 13 fulan-Juñu 2024 ho valór kontratu millaun $3.4 ho durasaun konstrusaun tinan ida-resin.
Jornalista : Alexandra da Costa
Editór : Cancio Ximenes
