Tinan 17 ezisténsia UEP, Governu komprometidu investe ba kondisaun serbisu
DILI, 14 Agostu 2026 (TATOLI)—Polísia Nasionál Timor-Leste (PNTL) husi husi Unidade Espesiál Polísia (UEP), Sesta ne’e, komemora tinan 17 ezisténsia.
Biban ne’e, Ministru Interiór, Francisco da Costa Guterres, hateten, Governu komprometidu investe ba UEP hodi profisionaliza iha knaar.
“Iha okaziaun ida-ne’e hakarak hato’o ba ita-boot sira katak Governu komprometidu atu investe ba Polísia Nasionál Timor-Leste, liliu ba ita-boot sira-nia kondisaun loloos ne’ebé relevante ba serbisu ho di’ak,” Ministru Francisco hato’o iha ámbitu serimónia iha Kuartél UEP, Bairru-Pité.
Governante ne’e louva instituisaun ho nia membru sira tanba hatudu ona serbisu di’ak.
“Kontinua agradese ba ita-boot sira-nia serbisu di’ak husi imi-nia família, imi-nia oan, no imi-nia dedika-an ba rai ida-ne’e. Ha’u agradese unidade ida-ne’e ne’ebé forma iha tinan 2009, ne’ebé primeiru Komandante UEP ne’ebé daudaun hanesan Komandante Jerál PNTL, agradese tanba bele organiza unidade ida-ne’e sai unidade ne’ebé nasaun no povu tau ninia fiar ba sira hodi serbisu ho di’ak,” nia akresenta.
Notísia relevante : PNTL destaka disiplina, profisionalizmu no espesializasaun iha aniversáriu UEP
Aleinde ne’e, Ministru agradese mós Komandante ne’ebé komanda unidade ho dedikasaun hodi bele prepradu hasoru situasaun iha futuru.
“Husu nafatin ba ita-boot sira atu mantein nafatin kapasidade serbisu ho disiplina, halo serbisu ho profisionalizmu ne’ebé a’as no tau interrese nasionál a’as duké interrese privadu sira. Daudaun ita-nia povu hein hela ita fó estabilidade, seguransa no hakmatek para sira bele hala’o sira-nia vida loroloron,” nia katak.
Governante ne’e konsidera, UEP ne’e importante tebes ba Komandu Jerál PNTL ne’ebé mak durante ne’e hala’o nia serbisu hodi bele kumpre misaun.
“Unidade ida-ne’e sempre hasoru komplesidade no risku oioin husi situasaun ne’ebé mak esesionál, maibé ita-boot sira-nia prezensa hodi ultrapasa situasaun sira ne’e hodi fó hakmatek ba povu no nasaun hodi kontinua hala’o dezenvolvimentu,” nia tenik.
Ministru nota, komemorasaun aniversáriu ne’e iha momentu importante tebes ba Timor-Leste eziije UEP prepara-an iha prosesu integrasaun rejionál, ne’ebé daudaun enfrenta hela fenómena oioin, liliu kona-ba krime organizadu transnasionál.
“Tanba ne’e ezije tebes atubele hala’o serbisu hodi kombate hamutuk ho instituisaun relevante hotu atu nune’e ita bele fó resposta loloos no disiplinadu ho tékniku ne’ebé di’ak atu nune’e kombate kualker situasaun ne’ebé ladi’ak iha ita-nia rai,” nia hato’o.
KomJer husu hatudu disiplina no kumpre orden
Komandante Jerál (KomJer) PNTL, Komisáriu Asisténte Afonso dos Santos husu ba membru UEP atu kontinua hatudu disiplina iha serbisu no kumpre orden sira.
“Unidade ida-ne’e nia ezisténsia reprezenta tinan 17 ba dedikasaun, disiplina, profisionalizmu no espíritu serbisu ba nasaun. Ita-boot sira-nia serbisu dalabarak ezijente no hala’o iha sirkustánsia difísil, merese hetan respeitu no rekoñesimentu husi PNTL tomak,” nia akresenta.
Komandante Jerál PNTL enkoraja membru UEP atu kumpre misaun ho disiplina no husu atu kumpre misaun no korajen.
“Kontinua kumpre imi-nia misaun ho disiplina, korrajen, profisionalizmu no respeitu ba sidadaun sira, fó onra nafatin ba farda ne’ebé imi hatais no valores PNTL nian,” nia fó hanoin.
Komandante parabeniza membru UEP sira hotu ba komemorasaun aniversáriu no dezeja susesu nafatin iha misaun.
Jornalista : Natalino Costa
Editora : Julia Chatarina
