Ministru Samuel Marçal kontinua monitoriza projetu infraestrutura atu garante kualidade obra
MANUFAHI, 16 Agostu 2026 (TATOLI)-Ministru Obra Públika, Samuel Marçal, hamutuk ho ekipa téknika sira kontinua halo observasaun ba infraestrutura iha Suai, Kassa, Oebaba no Betanu, ho objetivu atu garante katak empreza sira la abandona projetu ne’ebé uza orsamentu Estadu nian.
Ministru Samuel Marçal hatete katak atividade monitorizasaun ne’e bazeia ba planu ne’ebé antes ne’e elabora ona iha semana kotuk. Planu ne’e inklui vizita bá obra hotu-hotu iha territóriu, inklui estrada nasionál, munisipál no rurál.
“Objetivu husi atividade ne’e mak atu haree progresu serbisu iha terrenu, aleinde ne’e mós atu haree obra ne’ebé la kualidade no projetu ne’ebé kompañia koko atu abandona”, Ministru relata ba jornalista sira iha Betanu, ohin.
Governante ne’e hatutan katak, bainhira nia ho ekipa halo observasaun iha Oebaba, Zumalai, sira deteta traballadór sira uza fatuk ki’ik hodi halo bronjon. Tanba ne’e, nia orienta kedas tékniku sira atu haree obra no haruka traballadór sira sobu fali parte obra ne’ebé la tuir padraun.
“Ami-nia vizita ne’e mós atu rona obstákulu ne’ebé kompañia hasoru iha terrenu, tanba projetu balun demora tanba de’it problema sosiál, entaun ita mai atu rona hodi fó solusaun”, nia relata.
Hodi hatete katak, liuliu iha tempu bailoro hanesan agora, empreza sira tenke aproveita kondisaun Di’ak hodi aselera serbisu iha terrenu. Nune’e, bainhira tempu udan, obra sira bele iha progresu di’ak. Se la’e, serbisu demora no bele la remata tuir tempu ne’ebé estipula iha kontratu.
“Alternativa ne’e atu eduka ita-nia kontratór timoroan sira hodi promove sira-nia serbisu ho profisionál”, nia esplika.
Durante vizita, ekipa MOP deteta projetu balun kompañia sira implementa la tuir prosedimentu dezeñu. Iha mós empreza balun ne’ebé la hatudu vontade atu serbisu. Tanba ne’e, ministru kontinua alerta ba kompañia sira atu serbisu ho seriedade no responsabilidade hodi garante obra ne’ebé kualidade.
Aividade observasaun ba projetu infraestrutura sira-ne’e inklui estrada, drainajen, bronjong, ponte no muru protesaun.
Notísia relevante: Reabilitasaun estrada urbana iha Ainaru atinje 15%
Jornalista: Alexandra da Costa
Editora: Maria Auxiliadora
