Rai-nakdoko iha Flores hamate ona ema na’in-47
DILI, 16 Agostu 2026 (TATOLI) – Ajénsia Nasionál Jestaun Dezastre (BNPB, sigla indonézia) fó-sai dadus preliminár to’o sábadu kalan, tuku 18:48, ne’ebé indika totál ema mate tanba rai-nakdoko ho magnitude 7,7 provínsia Nusa Tenggara Leste (NTT), Flores, to’o ona ema na’in 47.
Berton SP Panjaitan, Xefe Interinu hosi Sentru Dadus Dezastre, Informasaun no Komunikasaun BNPB nian, hatete iha nota imprensa ida iha Jakarta, katak númeru mate hanesan tuirmai: 24 iha Rejénsia Manggarai, 17 iha Manggarai Leste, 3 iha Sikka, 1 iha Ngada, no 1 iha Ende.
“Aleinde vítima mortál sira-ne’e, pesoál sira evakua ona no fó ona tratamentu médiku ba sira ne’ebé kanek,” nia hatete.
Kona-ba edifísiu ne’ebé hetan estragu, nia relata totál uma 157 hetan estragu maka’as, 41 hetan estragu moderadu, no 148 hetan estragu kmaan.
Akontese mós estragu ba instalasaun públiku sira, inklui fasilidade edukasionál 87, fasilidade saúde 18, fatin kultu lima, eskritóriu neen, no instalasaun públiku lubuk ida.
Hatán ba insidente ne’e, BNPB apoia ai-han no la’ós ai-han nian ba área ne’ebé afetadu hosi dezastre.
Fornesimentu ajuda sira mobiliza liuhosi armajen lojístika ida iha Rejénsia Flores Leste, Nusa Tenggara Leste (NTT).
“Entretantu, hosi Jakarta, BNPB mós haruka ajuda liuhosi baze operasaun Halim Perdanakusuma Forsa Aérea Indonézia nian.
Ajuda totál kompostu hosi pakote 50.000 ho todan tonelada 275.
Agora daudaun, pakote 10.500 ne’ebé fornese hosi Sekretáriu Gabinete to’o ona iha baze operasaun nian,” nia hatete.
Notísia relevante: Rai-Nakdoko iha Indonézia: Númeru ema mate sa’e ba 38
Fonte: Antara
