Governu entrega karreta Toyota Hiace ba CPNTL liuhusi programa doasaun
DILI, 17 Agostu 2026 (TATOLI)—Vise-Ministra Finansa, Regina de Jesus de Sousa, hamutuk ho Diretora Jerál Diresaun Jerál Jestaun Patrimóniu Estadu (DJJPE), Timotea P. Marques, ofisialmente asina termu entrega karreta ho marka Toyota Mini Bus Hiace ba Komité Paralímpiku Nasionál Timor-Leste (CPNTL) iha Aitarak Laran, kinta ne’e.
Kareta ne’e Komité Paralímpiku Nasionál Timor-Leste (CPNTL) hetan liuhusi programa doasaun husi Ministériu Finansa liuhusi DJJPE.
“Ami rekoñese katak proposta sira-ne’e tama kle’ur ona halo ita-boot sira hein kle’ur loos tanba ekipa DJJPE sei halo verifikasaun ba totál proposta doasaun nian. Organizasaun sira hatama hamutuk 31 proposta no DJJPE mós presiza halo verifikasaun no manutensaun ba karreta sira-ne’ebé atu halo doasaun nia kondisaun tanba karreta sira-ne’e kategoria karreta uzadu la’ós foun,” Vise-Ministra Finansa, Regina de Jesus de Sousa, hateten.
Tanba ne’e, nia esplika, parte DJJPE presiza duni halo verifikasaun hodi konfirma loloos karreta sira-ne’e nia kondisaun molok bolu parte Komité Paralímpiku Nasionál Timor-Leste (CPNTL) mai simu kareta doasaun.
Vise-Ministra Finansa hatutan katak karreta ne’e maske uzadu maibé nia kondisaun di’ak tanba ekipa DJJPE verifika no konfirma katak karreta sira-nia kondisaun di’ak no bele uza dunia, tanba ne’e husu ba parte CPNTL atu uza ho kuidadu tuir nesesidade serbisu organizasaun nian ba interese públiku nian.
Iha fatin hanesan, Prezidente CPNTL, Mateus Lukas, hato’o obrigadu no agradese wa’in ba Ministériu Finansa tanba konsidera ona proposta doasaun kareta ba CPNTL husi proposta 31 ne’ebé Ministériu Finansa simu liuhusi DJJPE.
“Hodi estrutura no funsionáriu CPNTL nia naran uluk nanain hakarak agradese wa’in ba Ministériu Finansa tanba konsidera ona proposta doasaun karreta ba CPNTL husi proposta doasaun 31 ne’ebé organizasaun benefisiáriu ba doasaun sira submete mai Ministériu Finansas,” Mateus Lukas dehan.
Nia afirma katak CPNTL hein kle’ur maibé ohin konsege hetan duni doasaun ne’e. Nia promete sei kuidadu ho didi’ak no uza tuir nesesidade serbisu CPNTL nian.
“Ami sei kuidadu ho didi’ak no uza tuir nesesidade serbisu CPNTL nian, no ami mós sei uza hodi fasilita atleta sira ba halo konsentrasaun,” nia afirma.
Karreta doasaun ne’ebé CPNTL simu ne’e entrega direita husi Vise-Ministra Finansa, Regina de Jesus de Sousa, akompaña husi Diretora Jerál DJJPE, Timotea P. Marques, ho Despaxu Aprovasaun Doasaun númeru ref: 57/DJJPE/MdF/VII/2026.
Jornalista : Hortêncio Sanchez
Editór : Cancio Ximenes
