Tenente Jenerál Falur atualiza preparasaun ikus komemora loron FALINTIL ba Xanana
DILI, 17 Agostu 2026 (TATOLI)—Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Domingos Raúl “Falur Rate Laek”, hala’o enkontru ho Primeiru-Ministru, Kay Rala Xanana Gusmão, hodi atualiza kona-ba preparasaun ikus komemorasaun loron FALINTIL ba da-51 ne’ebé sei selebra iha Foho Matebian, Postu Administrativu Kelikai, Munisípiu Baukau.
“Ha’u mai hasoru Primeiru-Ministru hodi relata kona-ba preparasaun ikus ba komemorasaun loron FALINTIL ba daa-51 iha rejiaun fronteira foho Matebian,” Tenente Jenerál Falur Rate Laek, hateten ba jornalista iha Palásiu Governu, ohin.
Xefe Estadu F-FDTL ne’e dehan, serimónia ne’e iha ámbitu rekonsiliasaun nasionál iha dimensaun esterna no interna, ne’ebé iha dimensaun esterna ninian mak halo iha Foho Matebian no ida dimensaun interna sei halo iha Loihunu.
“Tanba ne’e ha’u husu apoiu tomak husi parte relevante sira atu ha’u iha faze tranzisaun ba jerasaun sira tuir mai, nia dehan.
Nia haktuir, durante enkontru Primeiru-Ministru fó apoiu tomak maibé kona-ba partisipasaun seidauk fixu tanba Xefe Governu mós iha ajenda barak liuliu reuniaun orsamentu 2027, reuniaun CPLP nian no diversu sira seluk.
Bainaka importante sira-ne’ebé atu partisipa mak husi Malázia, Portugál, Austrália, Nova Zelándia, Kanadá, Indonézia, Estadu Unidu Amérika, no bainaka sira-ne’e sei balun deskansa iha Baukau no balun iha Dili
“Ita konvida sira mai tanba sira ita-nia parsériu dezenvolvimentu no sira mós sei sai testamuña ba ita-nia aktu istóriku, kulturál no ita-nia kompromisu ba pás ne’ebé dura,” nia hateten.
Iha biban ne’e mós nia informa kona-ba prosesu tranzisaun ne’ebé nia hala’o hela iha instituisaun F-FDTL.
Jornalista : Alexandra da Costa
Editór : Cancio Ximenes
