EDTL garante populasaun Bobonaru sei asesu hotu eletrisidade iha tinan ne’e
BOBONARU, 18 Agostu 2026 (TATOLI) – Eletrisidade Timor-Leste (EDTL, E.P) Munisípiu Bobonaru kontinua implementa Programa Timor Naroman hodi habelar asesu liña eletrisidade ba komunidade iha aldeia no subaldeia sira.
Koordenadór EDTL Munisípiu Bobonaru, Mário de Jesus Soares, garante katak iha 2026 ne’e, populasaun iha Bobonaru sei asesu eletrisidade 100%.
Nia hatete katak iha fulan hirak liubá, EDTL implementa ona projetu eletrifikasaun iha área Mautalo, postu administrativu Kailaku, no iha Bobonaru, Soilesu no Aldeia Faturui, Leo-Lima, ne’ebé benefisia ona populasaun liu 500.
Aleinde ne’e, EDTL sei kontinua implementa projetu Timor Naroman iha Kolimau, aldeia Polo, Lour no Raifun Foho, postu administrativu Maliana, no bairu sira seluk iha Bobonaru, Lolotoe no Atabae.
“Karik ida-ne’e sai hotu, ita bele dehan katak populasaun Bobobaru husi aldeia, suku bele asesu hotu ona eletrisidade. Agora, ita iha suku 50 mak 100% asesu hotu ona, falta aldeia rua ne’e mak asesu, ita konklui ona”, nia informa.
Komunidade aldeia Raifun Foho, Elsa Sose Mau, rekomenda ba EDTL atu aselera projetu eletrifikasaun hotu, nune’e aldeia Raifun Foho bele sente ona naroman hanesan aldeia viziña sira.
“Ami durante tinan 20-resin senti triste tanba hela de’it iha nakukun. Ami fiar katak Governu bele tau-matan mai ami atu tinan ne’e ami mós bele hetan ahi, tanba ami-nia aldeia ne’e parte ida husi kapitál Maliana”, nia fó hanoin.
M unisípiu Bobonaru iha aldeia 193, suku 50 no postu administrativu neen ho nia totál populasaun pur volta 132.547.
Notísia relevante: Governu presiza moderniza sistema EDTL iha Bobonaru
Jornalista: Sergio da Cruz
Editora: Maria Auxiliadora
